İşğal etilgen Qırımda fiyatlarnıñ artması mallarnıñ yarımadadan qomşu Rusiyege çıqarılmasınen bağlı. Bu aqta Rusiye kontrolindeki Qırım köy hocalığı naziri Andrey Rumşin martnıñ 30-nda koronavirus yuqunçınıñ tarqaluvına qarşı tedbirler ştabınıñ toplaşuvında ayttı.
«Bugünki künde vaziyetimiz şu ki, yahşı keyfiyetli malımız tek ağğa kirmemek degil, (qomşu Rusiyege – QA) çıqarıla. Brânsk, Kursk fiyatlarnı arttırğanı ve sıñırlarnıñ bir qısmını qapatqanı içün bugün Krasnodar, Rostov, Stavropolge mallarımız çıqarıla. Köy hocalıqnen oğraşqan insanlardan kötere satışnı toqtatmalarını rica etemiz. 20, 40 tonnalıq furalar Qırım tışına kete», – dep bildirdi o.
Rümşin, Qırımda artqan mal fiyatlarınen yarmalıqlarnen vastasınen küreşmege teklif etti.
Martnıñ 27-nde işğal etilgen Qırımda restoran, qave, bar, aşhane, bufet ve diger aş müessiselerini vaqtınca qapatmağa qarar alındı. Sımarış berip almaq ve evge sımarış etmek imkânı olacaq.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
