İşğal etilgen Qırımda restoran, qave, bar, aşhane, bufet ve diger aş müessiselerini vaqtınca qapatmağa qarar alındı. Sımarış berip almaq ve evge sımarış etmek imkânı olacaq.
Bu aqta Rusiye kontrolindeki Qırım baş nazir muavini, emek ve içtimaiy qoruv naziri Yelena Romanovskaya martnıñ 27-nde koronavirus yuqunçınıñ tarqaluvına qarşı ştab toplaşuvında bildirdi.
Onıñ aytqanına köre, bu sıñırlavlar yaşayışnı temin etken teşkilâtlarnıñ hadimleri içün çalışqan aşhane, qave ve bufetlerge tesir etmeycek.
«Yasaq ava limanımızda çalışqan müessise faaliyetine tesir etmeycek, kelgenler ve ketkenler temiz alanda qalacaq», – dedi Romanovskaya.
Aqyarda ilk beş koronavirus hastası qayd etildi, dep bildire martnıñ 27-nde Aqyar Rusiye ükümetiniñ yolbaşçı vazifelerini vaqtınca eda etken Mihail Razvojayev.
Aqyarda COVID-19 telükesi sebebinden 1767 insan közetüv altında edi.
Qırım ve Aqyardaki Rospotrebnadzor idaresiniñ yolbaşçısı Natalya Penkovskayanıñ bildirgenine köre, Qırımda martnıñ 27-nde saba yedi yañı koronavirus hastası qayd etildi. Böylece hastalanğanlarnıñ sayısı 14 oldı.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
