Rusiye kontrolindeki Qırım kurort ve turizm nazirligi yarımadada koronavirus hastalarınıñ sayısı artqanı içün Kezlevdeki «Pobeda» şifahanesinde yañı observator açılışını tezleştirmeli, dep bildirdi Qırımnıñ Rusiye baş nazir muavini Yelena Romanovskaya COVID-19 ile küreş operativ ştabınıñ toplaşuvında.
Onıñ aytqanına köre, şimdi observatorlarda 50 boş yer bar.
«Çetelden insanlar kele, bu gruppalarnıñ cedvelini kördik, observatorlar tez tolacaq. Koronavirus ocaqları hastahanelerde qayd etilgenine köre koronavirusı tasdıqlanmağan bütün ekimler hastahanede degil, observatorlarda qalmalı, dep tüşünem, daa ziyade tarqalmasın. Qoşma yerler olmalı», – dep añlattı Romanovskaya.
Keçken afta berilgen malümatqa köre, Kezlevdeki «Pobeda» şifahanesi observator rejiminde çalışacaq.
Qırımnıñ Rusiye akimiyeti, mayısnıñ 13-nde keçken künü 30 yañı koronavirus hastası qayd etildi, dep bildirdi.
Böylece, al-azırda Qırımda 239 koronavirus hastası qayd etildi. 24-ü çetelden keldi, 21-i – Rusiyeden. Eki kişi vefat etti, daa ekisiniñ vefat sebebi şimdilik belli degil, amma COVID-19 qayd etilgen edi. 78 insan tüzelip yahşı oldı. Aqyarda – 129 koronavirus hastası bar, eki kişi vefat etti.
Qırımnıñ Rusiye akimiyeti bildirgenine köre, mayısnıñ 12-nden itibaren mecburiy qoruv maskalarını taquv rejimi kirsetile, Qırımda özüni izolâtsiya etüv rejimi mayısnıñ 31-ne qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
