Rusiye akimiyeti kontrolindeki Qırım sağlıq nazirligi soñki künde 24 kişi koronavirus yuqunçına oğrağan Aluşta hastahanesinde iş tahqiqatını başlattı.
Bu aqta mayısnıñ 6-nda Rusiyeniñ baş nazir muavini Yelena Romanovskaya COVID-19 tarqaluvı ile küreş operativ ştabınıñ toplaşuvında bildirdi.
«Aluştada Qırım Cumhuriyetiniñ Sağlıq Nazirligi iş tahqiqatını başlattı. Bugün anda komissiya teşkerüvge çıqa, tibbiyet hadimleriniñ şahsiy qoruv vastalarını qullanması da baqılacaq», – dedi o.
Qırımnıñ Rusiye yolbaşçısı Sergey Aksenovnıñ qayd etkenine köre, iç bir observatsiyada o qadar hasta daa olmadı.
«Sebebini bileyik, kütleviy şekilde hastalanğanlar», – dep qoştı Aksenov.
Romanovskayanıñ qayd etkenine köre, hastahane işini şimdilik toqtatmaycaq, kerekli yuqunçsızlaştıruv tedbirlerinden soñ COVID-19 hastaları Aqmescitniñ 7-nci hastahanesine yollanılacaq.
Böylece, al-azırda Qırımda 160 yañı koronavirus hastası qayd etildi. 21-i çetelden keldi, 17-si – Rusiyeden. 22 hastanıñ Rusiyeden kelgenlernen alâqası oldı, 100 kişi laboratoriyada tasdıqlanğan hastalarnen alâqada olğan edi. 41 kişi tüzeldi. Bir hasta vefat etti. Aqyarda 98 COVID-19 hastası bar, eki insan vefat etti.
Qırımnıñ Rusiye akimiyeti bildirgenine köre, mayısnıñ 12-nden itibaren maska rejimini kirsetmege azır. Daa evel Qırımda yüksek seviyeli azırlıq rejimi mayısnıñ 11-ne qadar uzatılğan edi, Aqyarda onı mayısnıñ 30-na qadar uzatqanlar.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
