Qırımda Rusiye polisi Aqmescitteki «Hizb ut-Tahrir davasınıñ» mabüsi olğan ve siyasiy mabüs dep tanılğan Tofik Abdulgaziyevniñ oğlu 16 yaşında vatandaş jurnalisti Amar Abdulgaziyevni yiberdi. Oña qarşı izin berilmegen yerde tütün içkeni içün memuriy protokol tizildi. Bu aqta «Qırım birdemligi» cemaat birleşmesi Qırım.Aqiqatqa bildirdi.
Amarnıñ birleşmege haber etkenine köre, Aqmescitniñ №3 «Merkeziy» polis bölüginde polisler ondan babası aqqında soradı, videoğa çıqarmağa tırıştı, amma genç razı olmadı.
Soñra imayeci İslâm Velilâyev keldi, o, Amarnen beraber Federal qanunnıñ 6.25 maddesi («Federal qanun belgilegen tütün içüv yasağı, içinde zıfır olğan mal ya da bazı yerlerde, bina ve obyektlerde nargile qullanuv yasağını bozuv») bozulğanına dair memuriy protokolnı imzaladılar. Bundan soñ vatandaş jurnalisti yiberildi.
«Protokolnen razımız, oğlan çağına yetmegeni içün tenbi olmalı, biz bunı rica ettik», – dep ayttı Velilâyev.
Faallerniñ malümatına köre, Amar Abdulgaziyev saba 10-dan Kreml kontrolindeki Qırım garnizon arbiy mahkemesiniñ binası ögünde mahkeme oturışuvınıñ neticelerini ve mahkeme ögünde adise-vaqialarnı aydınlatmaq içün vatandaş jurnalisti olaraq bulundı.
Kamerağa körülgen polis hadimleri ondan «terror ile küreş faaliyeti» sebebinden ve «mevsimge köre kiyinmegeni ve şübheli körünişi olğanı» içün vesiqa bermesini istedi.
Polis hadimleri kelgenlerden birinden vesiqa köstermesini rica etti. O, mahkeme olğan yerde yerleşken Qırım müendislik pedagogika universitetiniñ studenti olğanını aytıp, çetleşti. Amarnıñ pasportını baqıp ve çağına yetmegenini añlap, uquq qoruyıcalr ketti.
Soñra polis hadimleri Abdulgaziyevni tütün içkende videoğa çıqardı ve onı tutulğan narâdnı çağırdı. Onı çağına yetmegenlerniñ tütün içmesine dair qanunnı bozğanı içün №3 «Merkeziy» polis bölügine alıp kettiler.
Hatırlatamız, Qırımda Rusiye kontrolindeki Qırım garnizon arbiy mahkemesiniñ binası ögünde Rusiye quvetçileri 16 yaşında Amar Abdulgaziyevni tuttı.
Rostov-na-Donu Cenübiy okrugınıñ arbiy mahkemesi Aqmescitteki «Hizb ut-Tahrir davası» mabüsleriniñ apiste qaluv müddetini 2021 senesi dekabrniñ 16-na qadar uzattı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
