Qırımnıñ rusiyeli şeer ve rayonlarınıñ memuriyetleriniñ başları istifağa ariza berdi, dep haber etti Facebook saifesinde Qırımnıñ rusiyeli başı Sergey Aksönov.
"Qırım şeer ve rayonlarınıñ memuriyetleriniñ başları istifağa ariza bermege teklif ettim. Bu qarar, yañı taqımnı teşkil etmek ihtiyacı sebebinden qabul etildi. Bütün memuriyet başlıqları yerli şuralarğa arizalarnı yazdı", - haber etti Aksönov.
Onıñ aytqanına köre, yañı saylanğan mebuslar yaqın vaqıtta, şeer başlarınıñ saylama konkurslarınıñ müddetlerini belgiler.
Hatırlatayıq, sentâbr 20-sinde sessiyanıñ iş organlarınıñ tizmesi, parlamentniñ yañı spikeri saylaması ve, şimdi Sergey Aksönov becergen, Qırım başınıñ vazifesine namzetlerden birisi içün rey bermesi olacaq.
Qırım parlamentiniñ mebusları, qomşu Rusiyeniñ prezidenti teklif etken üç namzetten yarımadanıñ rusiyeli başını saylacaq. Volodımır Putin, şimdiki Qırım başı Sergey Aksönovnı, RFKP teşkilâtınıñ başı Sergey Bogatırenko ve Rusiye parlamentiniñ aşağı palatasınıñ Qırım mebusı Pavel Şperovnı teklif etti.
Sentâbr 8-inde Rusiye akimiyeti Qırım ve Aqyarda Qırım parlamenti ve yerli şuralarnıñ saylavlarını keçirdi.
Ukraina, ABD, Aropa Birligi ve dünyanıñ daa bir sıra memleketleri bu saylavlarnıñ qanuniyligini qabul etmey.
