Qırımdaki Rospotrebnadşçor yolbaşçısı Natalya Penkovskayanıñ bildirgenine köre, yarımadağa Moskva ve Sankt-Peterburgdan kelgenlerni mecburiy karantinge alacaqlar.
Bu aqta o, aprelniñ 8-nde Qırımda koronavirus tarqaluvına qarşı ştab toplaşuvında ayttı.
«Qırım ve Aqyar akimiyet organlarına bir teklif azırladım, yarımadağa Moskvadan ve vilâyetten kelgen ya da yarımadağa bu subyektler üzerinden keçken vatandaşlar içün özüni izolâtsiya etüv rejimi kirsetilmeli», – dedi o.
Rusiye kontrolindeki Qırım yolbaşçısı Sergey Aksenov onıñ tekliflerine qol tutıp, bunı nasıl yapacaqlarını tüşünmeli, dep qayd etti.
«Özüni izolâtsiya etken ve olarnı teşkergen İç işler nazirliginiñ kontroli altındaki üç biñge daa sekiz biñ qoşulğanını tüşünsek. Böyle imkânımız barmı bilmeyim… Moskva, Sankt-Peterburg seferi oldı – er kes özüni izolâtsiya etmeli ya da kerek olsa yüzde yüz er kes observatorğa alınmalı», – dep ayttı Aksenov. O, «Qırımda koronavirus hastaları ketirildi», dep qayd etti.
Hatırlatamız, aprelniñ 8-nde Yaponiyadan qaytqan qırımlınıñ koronavirusı qayd etildi.
Qırımnıñ Rusiye yolbaşçısı Sergey Aksenovnıñ aytqanına köre, Ermeni Bazardaki Merkeziy rayon hastahanesi koronavirus yuqunçınıñ tarqaluv telükesi sebebinden karantinge qapatıldı.
Aprelniñ 7-nde Aksenov yañı hastalar qayd etilse, koronavirus tarqaluvına yol bermemek içün sıñırlav tedbirlerini sertleştirecek, dep qorquzdı.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 12-ne qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
