Cumaertesi künü iyün 8-inde Qırımğa sağanaq, furtuna ve burçaq tüşecek, dep bildire Rusiye FVN-niñ Qırım idaresiniñ saytı.
“Qırım gidromettsentriniñ malümatına köre, iyün 8-inde Qırımda bazı yerlerde küçlü yağmur, furtuna, sağanaq, burçaq yağacaq, 20-25 m/s qadar yel üfürecek”, - denile beyanatta.
Ava bozulmasından sebep, qurtarıcılar, çare olğanda binalardan çıqmayıp, şeer kezintilerinden vazgeçmege yarımada sakinleri ve musafirlerine tevsiye ete. Em de maşnalarnı terek ve yazılar tübünde qaldırmamağa aydavcılarğa muracaat ete.
İyünniñ 7-nde Aqyarda küçlü yağmur yağdı. Şeerniñ çeşit rayonları ve soqaqlarını, şu cümleden Kazaçya buhta ve Aqyar avtovokzalını suv bastı. Aqyarnıñ şeer hızmetleri ve qurtarıcıları sağanaq aqibetlerinden sebep quvetleştirilgen rejimde çalışa.
Batqan Qırım. Sağanaqlar yarımadanı qapladı (süret toplamı)
Aqmescitte iyünniñ 7-nde küçlü boranlı yağmur yağdı. Aqşam ise kene sağanaq yağdı. Yağmur yarım saat yağdı, şeer merkezindeki yollarnı suv bastı.
