Rusiye advokatı, Kremlniñ Qırımdaki mabüsleriniñ imayecisi Aleksey Ladin advokatlıq litsenziyasından marum etildi. Böyle bir qararnı Rusiyeniñ Tümen vilâyetiniñ advokatlar palatasınıñ İhtisaslı komissiyası qabul etti. Buña sebep advokatqa qarşı ilhaq etilgen Qırımda açılğan memuriy davalar sebep oldı. Uquq qoruyıcılar bu davalarnı siyasiy sebepli dep adlandıra. Amma olar advokatnı taqip etmek içün resmiy sebep oldılar.
Aleksey Ladin 20 yıldan ziyade advokatlıq yaptı. Olardan aman-aman on yıl işğal etilgen Qırımda keçti. O, Qırım yarımadasına 2016 senesi Rusiyeniñ Tümeninden zenaat maqsadınen köçti. Yarımadada kütleviy basqılar başlağan soñ, Rusiye qanunlarını bilgen ve siyasiy davalarnen oğraşmağa azır olğan advokatlarğa büyük ihtiyac peyda oldı.
Aleksey Ladin Rusiye mahkemelerinde terrorizm ve ekstremizmde qabaatlanğan onlarnen qırımlı siyasiy mabüsni, hususan bir çoq qırımtatarlarnı temsil etti.
Rusiye Ukrayinağa tam miqyaslı istilâsını başlağan soñ, advokatnıñ imayesi altında Rusiye akimiyeti tarafından çeşit qabaatlavlar boyunca taqip etilgen Ukrayinanıñ cenübiy vilâyetleriniñ sakinleri peyda oldı. Olarnıñ arasında Herson vilâyetinde qaçırılğan ve Qırımğa yollanılğan ukrayin deñiz flotunıñ ofitseri Oleksiy Kısılev ve Melitopolde qaçırılğan ukrayinalı Pavlo Zaporojets ve ukrayin göñüllisi Yaroslav Juk.
Aleksey Ladin, Rusiyeniñ Ukrayinağa qarşı arbiy areketleri sebebinden Qırımda sertleşken memuriy ve küç basqısı şaraitlerinde bile faaliyetini toqtatmadı.
"Status: Toqtatıldı"
Rusiye Federatsiyasınıñ Tümen vilâyetiniñ Advokatlar palatasınıñ ihtisaslı komissiyasınıñ qararı (onıñ esasında Aleksey Ladin advokatlıq litsenziyasından marum etildi) 25 iyülde qabul etildi. O, cemaat içün açıq degil. Tümen vilâyeti advokatlar birliginiñ saytında endi advokat Aleksey Ladinniñ statusı "toqtatılğanı" aqqında qayd peyda oldı.
Aleksey Ladinniñ advokat statusını lâğu etüv qararı Rusiye İç işler nazirliginiñ Qırım bölüginiñ "E" merkeziniñ quvetçileriniñ teşebbüsi ile qabul etildi, olar advokatqa qarşı Rusiye adliye organlarına malümat yolladılar. Qırım quvetçileriniñ resmiy haber resurslarında bu aqta haber etilmey. Amma Aleksey Ladinniñ litsenziyasınıñ lâğu etilmesi aqqında haberni Qırım quvetçileri ile sıqı işbirlikte bulunğan "Krımskiy Smerş" Telegram-kanalı tarqattı, o, Ukrayina tarafdarları ve cenkke qarşı olğan qırımlılarnı taqip etmege yardım ete.
Aleksey Ladin komissiyanıñ qararınen razı degil ve onı şikâyet etmege niyetlene. O, advokat statusı olmasa da, müvekkillerini qorçalamağa devam etecegini de beyan ete.
Müvekkillerime kelgende, olarnı qorçalamağa devam etecem. Mahkemede olğan davalarnı advokatnen beraber imayeci olaraq kösterecem. Tahqiqatta olamaycam", — dedi o "Suspilne" neşrine bergen izaatında.
Litsenziyasız advokat resmiy olaraq vazifelerini eda etip olamay. Amma qanunğa köre o, öz imayesi altındaki insanlarnıñ vatandaş imayesi ola bile.
"Basqı devam etecek"
Aleksey Ladinniñ adliyecilik litsenziyasından marum etilmesiniñ resmiy sebebi, oña qarşı bir yıl evelsi qullanılğan eki memuriy ceza oldı. Advokat "Rusiye Silâlı quvetleriniñ itibarını tüşürüvde" (Rusiye Memuriy cinayetler kodeksiniñ 20.3.3 maddesi) ve "Rusiyede terakt teşkilâtı olaraq tanılğan Noman Çelebicihan batalyonınıñ timsallerini numayış etüvde" (Rusiye Memuriy cinayetler kodeksiniñ 20.3 maddesi) qabaatlanıp, eki aftalıq memuriy apis cezasını çekken edi.
Qırım mahkemesi bu tedbirni Aleksey Ladinniñ Facebooktaki cenkke qarşı ve Qırımda Rusiye akimiyeti ve quvetçileri tarafından taqip etilgen qırımtatar faallerine qoltutqan yazıları içün qullandı.
O, qabaatını inkâr etip, bu taqipni siyasiy sebepli dep adlandırdı. Bunı Ukrayinada yaşağan sabıq Rusiye advokatı Nikolay Polozov qayd ete. Onıñ aytqanına köre, Aleksey Ladinniñ taqip etilüvi ve advokatlıq litsenziyasından marum etilüvi Rusiye basqılarınıñ neticesidir. Daa evel o, Rusiyeniñ Ukrayinağa qarşı cenk başlağanından berli halqara toplulıq Rusiye akimiyetine insan aqları ve söz serbestligini qorçalav meselelerinde tesir etip olamay, dep, basqı dinamikası quvetleşecegini tahmin etken edi, şu cümleden Qırımda da.
Ve, ğaliba, bu repressiv basqı devam etecek
"Putinniñ satrapları işğal etilgen Qırımda yıllar devamında ukrayin ve qırımtatar siyasiy mabüslerini qorçalağan Aleksey Ladinni advokat statusından marum etti. İşğal şaraitlerinde siyasiy mabüslerni qorçalağan advokatlarğa qarşı Rusiye akimiyeti planlaştırılğan ve ardı-sıra basqı yapa. Ve, ğaliba, bu repressiv basqı devam etecek", — dep ayttı o.
"Maqsat insanlarğa mustaqil yardımnı yoq etmek"
Uquq qoruyıcılar toplulığında Aleksey Ladinniñ advokatlıq litsenziyasını lâğu etüv qararında siyasiy basqı alâmetlerini köreler.
Bu yaramay, amma tahmin etilgen haber
"Bu yaramay, amma tahmin etilgen haber. Rusiye Federatsiyasınıñ Tümen vilâyetiniñ advokatlar palatasınıñ tasil komissiyası bunıñ içün resmiy sebepler taptı. "Siyasiy işlerde" iştirak etken bütün qırımlı advokatlar taqipke oğratıla, para cezalarına oğratıla, bir qaç künge memuriy cezalarğa oğratıla, statuslarından marum etile, közetile, tenbiyeley — bu tek vaqıt meselesi edi", — dep bildirdi Facebookta Qırım uquq qoruyıcısı Lutfiye Zudiyeva.
Qırımda insan aqlarınıñ bozuluvı ve Rusiyeniñ arbiy cinayetlerini qayd etken "Tribunal. Krımskiy epizod" adlı aq qorçalayıcı teşebbüsinde Aleksey Ladinniñ taqip etilmesini siyasiy sebepli sayalar. Uquq qoruyıcılar qayd etkenine köre, advokatnıñ litsenziyasını lâğu etmek, oña qarşı "ekstremist timsalleri" ve "Rusiye ordusını itibardan tüşürüv" davaları uydurılğan soñ mümkün oldı.
Bu, Qırımda mustaqil advokatlarğa yapılğan birinci ücüm degil
"Bu, Qırımda mustaqil advokatlarğa yapılğan birinci ücüm degil. Umumen alğanda, advokatlarnıñ taqip etilüvi, bu basqılar işğal etilgen topraqlarda siyasiy sebeplerden taqip etilgen insanlarğa mustaqil ve açıq advokat yardımı bermemek içün yapılğan planlaştırılğan basqı siyasetiniñ bir qısmıdır", — dep aytıla aq qorçalayıcı teşebbüsiniñ beyanatında.
Aleksey Ladinniñ taqip etilüvi Qırımda mustaqil advokatlarğa nisbeten peyda olğan tendentsiyanıñ devamı oldı. Olarnı yaqalay, sorğuğa çeke, çeşit sebeplerden apiske ala ediler ve ilâhre. Rusiye Ukrayinağa tam bir istilâsını başlağan soñ, advokatlarğa qarşı usullar sertleşti.
2022 senesiniñ yazında qırımlı siyasiy mabüslernen bağlı onlarca mahkeme esnaslarında çalışqan üç qırımlı advokat — Lilâ Gemeci, Rustem Cemilev ve Nazim Şeyhmambetov - Aleksey Ladin kibi advokatlıq faaliyetine litsenziyasız qaldı.
Memuriy tevqif altında advokatlar Emine Avamilev, Ayder Azamatov, Nazim Şeyhmbetov, Edem Semedlâyev ve Emil Kurbedinov bulunalar. Bundan soñ Aleksey Ladinni de izolâtorğa yolladılar.
Advokatlar bu taqiplerni öz zenaat faaliyetinen bağlaylar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
