Rusiye ve Türkiye prezidentleri Vladimir Putin ve Recep Tayyip Erdoğan sentâbrniñ başında Soçide körüşecekler. Bu aqta Türkiye adalet ve kalkınma partisi bildirdi.
Körüşüvde Rusiyeniñ Qara deñiz aşlıq añlaşması ya da alternativasında iştirak etmesi muzakere etilecek.
Putinniñ matbuat kâtibi Dmitriy Peskov da Türkiye ve Rusiye liderleriniñ muzakeresi ve Kremlniñ azırlıq körgeni aqqında bildirdi.
Bloomberg neşiri menbalarına esaslanıp, körüşüv sentâbrniñ 8-nde keçirile bile, dep yaza.
Aşlıqnı Rusiye blok etken Qara deñiz limanlarından çıqarmağa imkân bergen añlaşma bıltır iyul ayında Türkiye ve BM yardımınen tizilgen edi. Añlaşma bir qaç kere uzatılğan edi.
Rusiye akimiyeti iyülniñ 17-nde kübreniñ Rusiyeden ihracat añlaşmalarınıñ bir qısmı yerine ketirilmedi dep, aşlıq añlaşmasından çıqa, dep bildirdi.
İyülniñ 18-nden itibaren Rusiye akimiyeti aman-aman er kün Odesa vilâyetine ateş açıp, aşlıq añlaşması içün qullanılğan liman infrastrukturasını yoq etip başladı. Amma Kreml ateşlerniñ sebebi iyülniñ 17-ne keçer gecesi Qırım köprüne yapılğan ücüm ola, dep bildirdi.
Bild alman gazetesi bildirgenine köre, Rusiye Türkiye ve Katarnen beraber bir ay evelsi bitken aşlıq añlaşması yerine yañı bir añlaşma azırlay. Berilgen malümatqa köre, Moskva aşlıq añlaşmasından çıqacağını Ankarağa evelden bildirdi, şunıñ içün Rusiye, Türkiye ve Katar eskisi yerine olacaq yañı üç taraflı añlaşma azırlap başladılar. Yañı vesiqağa köre, Rusiye aşlıqnı fuqare memleketlerge, Afrikağa berecek. Türkiye teşkilâtçı olacaq, Katar ise— taşımalarnıñ sponsorı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
