Rusiye ve Türkiye prezidentleri Vladimir Putin ve Recep Tayyip Erdoğan muzakere başlattı, dep haber ete TASS Rusiye agentligi. Körüşüv Soçideki «Rus» şifahanesiniñ «İmperial» korpusınıñ Yeşil salonında keçirile.
İyül ayınıñ ortasında aşlıq añlaşması bitken soñ eki lider ilk sefer körüşe. Reuters agentligi yaşçğanına köre, Erdoğan Putinni Ukrayınadan aşlıqnı ihrac etüv añlaşmasına qaytmağa iqna etecek ola. Bundan ğayrı, Milliyet türk gazetasınıñ malümatına köre, Erdoğan Ukrayına ile muzakerelerde aracılığını teklif etmek niyetinde.
Prezidentler gaznı Rusiyeden Avropağa Türkiye üzerinden berüv meselesini muzakere etecekler, Putin Türkiyede gaz habını qurmağa teklif etken edi.
Aşlıqnı Rusiye blok etken Qara deñiz limanlarından çıqarmağa imkân bergen añlaşma bıltır iyul ayında Türkiye ve BM yardımınen tizilgen edi. Añlaşma bir qaç kere uzatılğan edi.
Rusiye akimiyeti iyülniñ 17-nde kübreniñ Rusiyeden ihracat añlaşmalarınıñ bir qısmı yerine ketirilmedi dep, aşlıq añlaşmasından çıqa, dep bildirdi.
İyülniñ 18-nden itibaren Rusiye akimiyeti aman-aman er kün Odesa vilâyetine ateş açıp, aşlıq añlaşması içün qullanılğan liman infrastrukturasını yoq etip başladı. Amma Kreml ateşlerniñ sebebi iyülniñ 17-ne keçer gecesi Qırım köprüne yapılğan ücüm ola, dep bildirdi.
Bild alman gazetesi bildirgenine köre, Rusiye Türkiye ve Katarnen beraber bir ay evelsi bitken aşlıq añlaşması yerine yañı bir añlaşma azırlay. Berilgen malümatqa köre, Moskva aşlıq añlaşmasından çıqacağını Ankarağa evelden bildirdi, şunıñ içün Rusiye, Türkiye ve Katar eskisi yerine olacaq yañı üç taraflı añlaşma azırlap başladılar. Yañı vesiqağa köre, Rusiye aşlıqnı fuqare memleketlerge, Afrikağa berecek. Türkiye teşkilâtçı olacaq, Katar ise— taşımalarnıñ sponsorı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
