Rusiye prezidenti Vladimir Putin, ilhaq etilgen Qırımda salı künü "Tavrida" trassasınıñ qurucılarınen körüşecek. Bunı Putinniñ matbuat kâtibi Dmitriy Peskovnıñ sözlerinden TASS haber agentligi bildirmekte.
"Bugün prezident Qırımda çalışa. Putin, yol qurulışı meselelerinen oğraşacaq. O, Keriç - Kefe - Aqmescit - Bağçasaray - Aqyar yolunıñ, yani "Tavrida" trassasınıñ qurucılarınen körüşecek. Putin, iş ketişatını daa yahşı bilmege istey", - dedi Peskov.
Bundan ğayrı o, Putinniñ Rusiye baş naziri Olga Golodetsnen körüşüv keçecegi aqqında qoştı.
"Prazident, Aqyarda medeniyet ve tasil kompleksiniñ qurulışına azırlıqlar aqqında ondan haber alacaq", - dedi Peskov.
Daa evel Moskovağa boysunğan Qırım başı Sergey Aksönov, Vladimir Putinnen körüşkende, "Tavrida" trassasınıñ qurulışını 2020 yılına qadar bitirmege söz berdi.
Qurulıp turğan "Tavrida" trassasınıñ Aqmescitten Keriçkece 190 kilometrlik qısmı 2018 senesiniñ soñunda açılğan edi.
Yol areketi eki yolaqta yapıla, yapılıp turğan qurulış işleri sebebinden sürat sıñırlavı - saatte 60 km.
Qırım Naqliyat Nazirliginiñ tahminlerine köre, "Tavrida" trassasından Keriçten Aqmescitkece yol qararnen eki saatlıq olacaq, Keriçten Aqyarğa ise - üçten azca.
