İyün 20-de Vladimir Putin ile keçken "doğru hat" vaqtında, Qırımnıñ rusiyeli başı Sergey Aksönovğa içtimaiy ağlarda qırımlılardan şikâyetler kelip başladı.
Hususan, Aksönovnıñ Facebook saifesinde qırımlılar endi 50-ge qadar tefsir yazdı.
"Ne içün sadece yañı işaretler ve evakuatorlar, amma yañı park yerleri yoq? Kelip, maşna qaldırmaq yeriñ olmasa, "Tavrida" trassası ne kerek? Misal içün, Aluşta ve Yaltada", - dep yazdı qullanıcı Oleg Borodkin.
Bundan ğayrı qırımlılar mahsulat paalılaşqanına, kommunal hızmetleriniñ ücreti yükselgenine ve yarımadadaki ekologik müitke şikâyet ete.
"Sergey Valeryeviç, bizni raatsız etken sual! "Pud" tükânlarında esasen Krasnodar mahsulatı. Ne içün yerli Qırım istisalcıları yoq? Öz istisalcılarımızğa qol tutmalımız da, em de bizim mahsulatımız keyfiyetlice!", - dep soray Anastasiya Makarenko.
Rusiyede üylede prezident Vladimir Putin ile ananeviy «doğru hat» başladı.
Rusiye jurnalistleri bildirgeni kibi, Putinge endi 2 milliondan çoq sual berdiler.
