Qırım Muhtar Cumhuriyetinde Ukraina prezidentiniñ temsilciligi Rusiye nezaretinde olğan mahkemeniñ advokat Edem Semedlâyevniñ tevqif etmesine cevap berdi.
Temsilcilikte bildirgenleri kibi, Ukraina vatandaşı Edem Semedlâyevge dair “Rusiye Federatsıyası işğal memuriyetiniñ cinaiy areketlerni” takbih eteler.
Prezident temsiliciginde Semedlâyevge dair yarımadanıñ işğal memuriyetiniñ böyle adımları, onıñ “işğalci devletiniñ küç organları tarafından muntazam surette sahtelengen siyasiy sebeplerden açılğan davalarında Ukraina vatandaşlarınıñ qorunması boyunca advokat olaraq” zenaat faaliyetinen bağlı olğanını sayalar.
“Rusiye federatsıyasını advokat Edem Semedlâyevni deral azat etmege, vaqtınca işğal etilgen Qırımda Ukraina vatandaşlarına qarşı olarnıñ siyasiy baqışları, olarnıñ zenaat ve cemiyet faaliyeti içün basqılar ve taqip etüvler dalğasını toqtatmağa çağıramız. Edem Semedlâyevge destek bildiremiz. Ukraina, bu ve başqa cinayetlerde qabaatlı olğanlarnı mesuliyetke celp etmek içün elinden kelgenini yapacaq”, - dep yazıla bildirmede.
Aqmescitteki işğal makemesiniñ qararını, Ukraina Yuqarı Şurasınıñ vekâletli Lüdmila Denisova da tefsir etti.
“Edem Semedlâyev, ukrain siyasiy mabüsler Seytumer Seytumerov, Arsen Abhayirov, Remzi Bekirov, Nariman Memedeminov, Memed Belâlov, Emilâ Cemadenova, Zevri Abseyitov, Remzi Memetov, Refat Alimov, Ferat Seytumerovnıñ qoruyıcısı ola. Olarnıñ episi, 12 künge advoka desteginden marum qaldı, bu ise - İnsan aqlarnıñ imaye etilmesi ve esas serbestlikler aqqında şartnamesiniñ 13 maddesi ile kefalet etilgen imaye etüv aqqnıñ bozuluvı ola”, - qayd etti ombudsmen.
Dünya cemiyetini “işğal akimiyetiniñ tarafından vaqtınca işğal etilgen Qırımda aqlar ve serbestliklerniñ nevbetteki bozuluvına” cevap bermege çağırdı.
Noyabrniñ 11-nde Rusiye kontrolindeki Aqmescitniñ Kiyev rayon mahkemesi advokat Edem Semedlâyevni 12 künge apiske aldı ve Ekstremizm ile küreş merkeziniñ hadimlerinden biriniñ ögünde soyunmaqtan red etkeni içün 4 biñ ruble para cezasını berdi.
Cumaertesi künü, oktâbrniñ 25-nde, Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
Aqmescitte Rusiye kontrolindeki Qırım garnizor arbiy mahkemesiniñ binası ögünde tutulğan qırımtatar faalleri, jurnalistler ve advokat yarımada regionlarınıñ farqlı vaqtınca tutuv izolâtorlarına ketirildi. Oktâbrniñ 26-nda mahkeme keçirilmesi planlaştırıla.
Qırımnıñ Rusiye quvet müessiseleri bu tutuvlarnı tefsir etmey.
«Krım SOS» cemaat teşkilâtı Aqmescitte qırımtatar faalleri tutulğanı sebebinden «Qırım platformasınıñ» işini faalleştirmege çağırdı.
Rusiye quvetçileriniñ oktâbrniñ 25-nde qırımtatar faallerine qarşı yapqan areketlerini takbih etken beyanat Ukraina prezidentiniñ Qırım Muhtar Cumhuriyetindeki Temsilciligi tarafından aydınlatıldı.
