Ukraina prezidentiniñ Qırım Muhtar Cumhuriyetindeki daimiy temsilciligi Rusiye quvetçileriniñ Qırımda musulmanlarnıñ (ekseriyeti qırımtatarı ola) evlerinde keçirgen tintüvleri aqqında malümat Ukraina uquq qoruyıcılarına berile ve «milliy ve halqara seviyedeki işte» qullanılacaq, dep bildire.
Müessise, Qırımda saba olğan adiselerni «siyasiy taqip» dep adlandırdı.
«Ukraina prezidentiniñ Qırım Muhtar Cumhuriyetindeki temsilciligi işğalci memuriyetniñ er bir qanunsız siyasiy taqibini qayd etip, malümatnı uquq qoruyıcı organlarına bere ve onı milliy ve halqara seviyelerde işte qullana», – dep aytıla temsilcilik haberinde.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ evlerine keldi. Tahqiqat tedbirleri keçirilgende tutulğan insanlarnıñ tuvğanlarına berilgen malümatqa köre, olar Rusiye Ceza kodeksiniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – muar.) qabaatlana.
Tutulğanlarnıñ soy-sopları tintüvlerden soñ bildirgenine köre, Rusiye quvetçileri Ukraina pasportlarını da aldı.
Qırım Muhtar Cumhuriyeti ve Aqyar prokuraturası fevralniñ 17-nde Qırımda keçirilgen kütleviy tintüvler sebebinden cinaiy tahqiqat başlatıldı, dep bildirdi.
Çarşenbe künü Rusiye FSBsiniñ matbuat hızmeti, Rusiye cenübinde ve işğal altındaki Qırımda terror teşkilâtı dep adlandırılğan «At-Tekfir val-Hicra» iştirakçileri tutuldı, dep bildire. Lâkin bu malümatnıñ saba Qırımda musulmanlarnıñ evlerinde keçirilgen tintüvlernen alâqası barmı aytılmay.
