Ukraina prezidenti Volodımır Zelenskıy, 2014 senesinden ve o akimiyetke kelmegence “Qırımnıñ keri qaytarılmasını” iç kimse tüşünmegen, dep ayta. Bu aqta yanvarnıñ 28-nde Prezident ofisiniñ saytında yayınlanğan bildirmede yazıla.
Zelenskıy, memleket mustaqilliginiñ 30-nci yıllığınıñ qayd olunması munasebeti ile tantanalı tedbirlerniñ keçirilüv planını ve “Qırım platforması”nıñ areketke keçirilüvini Ofisiniñ reberligi ve UTN başı Dmıtro Kulebanen muzakere etkenini bildirdi.
Bildirmede qayd etilgenine köre, eki vaqia da strategik olaraq halqara tolpulığınıñ iştiraginen keçirilmeli.
“Oz topraqlarımıznı teslim etmeycekmiz. Bu bizden evel oldı, amma tüzetecekmiz onı biz. 2014 senesinden ve men akimiyetke kelgence Qırımnıñ qaytarıluvını kimse tüşünmemegeni pek yañlış. “Qırım platforması”, Ukraina topraq bütünligine qoltutqan bizim halqara ortaqlarımıznı birleştirecek meydançıq olacaq. Men içün bu boş laf degil. Onıñ arqasında tüzgün arketler bar”, – Prezident ofisi Zelenskıynıñ aytqanlarından alıntı ketire.
«Qırım platforması» halqara sammiti Ukrainada 2021 senesi avgustnıñ 21-nde olacaq, dep bildirdi Ukraina prezidenti ofisiniñ reber muavini İğor Jovkva.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Rusiye kontrolindeki Qırım yolbaşçısı Sergey Aksenov emin ki, yañı halqara meydançıqnıñ quruluvı «Qırımnı qaytarmağa» yardım etmeycek.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
