Ukraina prezidentiniñ QMC-deki daimiy temsilcisi Anton Korineviç ABD devlet kâtibiniñ demokratiya, insan aqları ve emek meseleleri muavini Kara MakDonald ile onlayn körüşüv keçirdi. Körüşüv vaqıtnda taraflar «Qırım platformasınıñ» sammitini muzakere ettiler. Bunı Prezident temsilciliginiñ matbuat hızmeti haber etti.
«Subet vaqtında bir sıra aktual sualni muzakere ettik, olarnıñ arasında «Qırım platformasınıñ» tesis sammitiniñ keçirilüvi, memuriy sıñırdaki vaziyet, vaqtınca işğal etilgen QMC ve Aqyar şeerinden mecburen köçkenlerniñ ve işğal etilgen Qırımda yaşağanlarnıñ aqlarını ve menfaatlarını qorumaq içün Ukrainanıñ yapqan areketleri», – dep yazıla bildirmede.
Berilgen malümatqa köre, Korineviç MakDonaldge «Qırım platformasıniñ» planları, tessis sammitiniñ keçirilüvi ve çalışuvı aqqında aytıp bergen.
Korineviç qayd etti ki, Qırım ve Herson arasında memuriy sıñırnı karantin sıñrlavlarını köz ögünde tutıp er vaqıt kibi keçmek mümkün.
Bundan ğayrı, temsilclikte bildirgenlerine köre, devlet memleket içinde mecburen köçkelerniñ ve işğal etilgen Qırımda yaşağanlarnıñ aqlarını temin etmek maqsadınen «elinden kelgenini yapa».
Prezident temsilciligi, Amerkia ükümetine «vaqtınca işğal etilgen Qırımda yaşağanlarnıñ ve mecburen köçkelerniñ aq ve serbestliklerini qorumaq yolunda destegi içün» minnetarlıq bildirdi.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
