Rusiye FSB-si zapt etken ukrain deñizcilerniñ azat etilmesi - "yaqın kelecekniñ perspektivası, çoqqa sürecek soyu degil". Böyle fikirni iyül 31-inde advokat Nikolay Polozov Qırım.Aqiqatqa ifade etti.
"Mahkeme, deñizcilerniñ apis müddetini oktâbr ayına qadar uzattı. Men, o müddetten evel olarnıñ azat etilmesi aqqında siyasiy qarar ola bile, dep tüşünem. Bu kelecek aftamı, avgusttamı ya da sentâbrdemi olacaq, dep cevaplanıp olamayım", - dedi Polozov.
Onıñ aytqanına köre, deñizcilerniñ ileride tutulması rusiye akimiyetine zarar ketire bile, amma "olar buna, elbette ki, yol bermezler".
Moskva mahkemesi iyülniñ 17-nde zapt etilgen 24 ukrainalı deñizciniñ apis müddetini uzattı. Andrey Artemenko, Andrey Eyder ve Vasiliy Soroka oktâbrniñ 26-na qadar, qalğanlarnı 24-ne qadar nezaret altında qalacaq.
Ukraina Tış İşler naziri Pavlo Klımkın, zapt etilgen ukrain deñizcilerni qaytarmaq içün bütün olğan küçlerini qullanmağa G20 memleketlerine muracaat etti.
Mayıs 25-inde Deñiz uquqı Halqara Tribuanlı, Rusiye zapt etken ukrain deñizcilerniñ davası boyunca Hamburgde keçken oturışta, uzatmadan arbiy gemilerni azat etmek ve Ukraina nezareti altına qaytarmaq Rusiyeni mecbur etti.
Iyün 25-inde qarar çıqarılğanından bir aylıq müddet keçti.
Rusiye Tış İşler Nazirligi, BMT Tribunalınıñ ukrain deñizcilerniñ tutulıp alınğanı aqqında davanı baqmaq aqqı yoq, dep bildirdi.
