Rusiye advokatı Nikolay Polozov, ukrain deñizcilerniñ davası boyunca Rusiye tahqiqatçısı şimdi işğal etilgen Keriçte buluna, dep aytıp berdi. Anda, Rusiye FSB-si tarafından zapt etilgen ukrain arbiy katerleri alâ daa qalmaqta. Bunı Polozov, Qırım.Aqiqat Radiosı ifirinde saba ayttı.
“Ukrain gemileriniñ qaytarılması aqqında sual daa bir qaç afta evelsi köterildi ve bunıñ aqqında biz tahqiqatçınen laf ettik. O, Keriçke baracağı ve anda bu gemilerniñ berilüvinen bağlı nasıldır amellerde iştirak etecegi aqqında aytqan edi. Al-azırda tahqiqatçı anda ketti, ve bu belki de gemilerniñ qaytarılması olacağını köstere”, – dedi Polozov.
Daa evel Polozov, zapt etilgen deñizciler ve gemiler Ukrainağa qaytarılğan soñ, Rusiyede bu vaqianıñ tabiiy ve mantıqlı yekünlevi olaraq, deñizcilerge qarşı cinaiy davanıñ qapatılması olmalı, dep aytqan edi.
Noyabr 17-sinde Qırımda Rusiye FSB-siniñ sıñır idaresiniñ matbuat hızmetine atıf etip TASS haber agentligi, zapt etilgen gemilerni noyabr 18-inde berecekler, dep yazdı.
Qırım matbuatınıñ malümatına köre, "Berdânsk" ve"Nikopol" arbiy katerleri ve "Yañı Qapu" buksiri Ukrainağa neytral suvlarda berilmek kerek.
Qırım.Aqiqat daa evel haber etkeni kibi, bazar künü noyabr 17-sinde Keriçte "Genmol" limanınıda tutulğan "Berdânsk" ve "Nikopol" zapt etilgen ukrain katerlerni yollamaqqa azırlap başladılar.
Daa evel Ukraina prezidenti Volodımır Zelenskıynıñ yardımcısı Andriy Yermak, 2018 senesi noyabrde Rusiye silâ yardımınen zapt etken Ukraina Arbiy Deñiz Quvetleriniñ üç gemisiniñ Ukrainağa qaytarılmasınıñ soñki basamağı aqqında aytıp berdi.
"Bıltır noyabrde zapt etilgen "Nikopol" ve "Berdânsk" arbiy katerlerini, "Yañı Qapu" buksiriniñ qaytarılması soñki basamağına keldi", - dedi o HB matbuatına.
