İlhaq etilgen Qırımdan olğan Rusiye Devlet Dumasınıñ deputatı Natalya Poklonskayanıñ keliri bir yılda 700 biñge arttı. Bunı Devlet Dumasınñ saytında derc etilgen onıñ 2019-ıncı yıl içün kelir beyannamesinde olğan malümat köstere.
Bu malümatqa köre, bir yılda Poklonskaya 5,4 million ruble qazandı, 2018-inci yılda ise bu 4,7 million ruble edi.
Poklonskaya alâ daa eki hızmet kvartirasınen qullana ve topraq parçasınıñ saibi ola. Aile qısmında sadece qızı belgilengen.
Qırımdan olğan Devlet Dumasınıñ deputatı Ruslan Balbek 2019-ıncı yılnıñ soñunda 5 million 428 biñ 131,37 rubleni vergi beyannamesinde qayd etti, 2018-inci yılda ise onıñ keliri 4 million 811 biñ 501,32 ruble edi.
Devlet Dumasına yapılğan yedinci çağıruv saylâvları 2016 senesi sentâbrniñ 18-nde Rusiyede ve işğal etilgen Qırımda keçirilerek, Ukraina ve Ğarp memleketleri tarafından keskin tenqit etilgen edi. ABD, Kanada, Fransa, İsveç, İngiltere, Almaniya, Çehiya, Türkiye kibi bir sıra devletler istilâ altındaki Qırımda keçirilgen saylâvlarnı qanunsız dep tanıdı.Poloniya Tışqı işler nazirligi Rusiyeniñ Devlet Dumasına yapılğan parlament saylâvlarnıñ umumen qanunğa uyğun şekilde keçirilgeninden şubelenmekte. Sentâbrniñ 20-nde Ukraina Yuqarı Şurası işğal etilgen Qırımdaki saylâvlarnıñ qanunsız keçirilgeni ve Rusiye Devlet Duması yedinci çağıruv terkibiniñ umumen qanunsız olğanınen bağlı qarar qabul etti.
