Rusiye Devlet Duması deputatı, işğal etilgen Qırımnıñ sabıq prokurorı Natalya Poklonskaya, yarımadanıñ rus başlıqları Şimal Qırım kanalından suv berilüvni yañırtmaq içün Ukraina ile aytışmaq kerek, dep saya.
Böyle etip Poklonskaya Donbasta vaziyetniñ tınç çezilmesinden Üç taraflı kontakt gruppasında Ukraina delegatsiyası başı Leonid Kravçuknıñ «Qırımğa suv tek gumanitar felâket olğan taqdirde beri bile», bildirmeni tefsir etti.
«Kravçuknıñ, Şimal Qıırm kanalı boyunca Qırımğa suv berilüvi yañartılması aqqında aytqanı kibi aytışmaq kerek, dep sayam. Ukrainanıñ birinci preziyenlti bildirgen sebeplerniñ episi endi bar», – «RİA Novosti Krıma» Poklonskayanıñ aytqanlarından alıntı ketire.
Onıñ aytqanına köre, böyle aytışmalar «nasıldır bir dialognıñ başı» ola bile.
Leonid Kravçuk, Qırımda suv qıtlığı meselesi daa da kerginleşecegine emin ve bu Rusiyeniñ Ukrainağa qarşı tecavuzınıñ artmasınıñ sebebi ola bile.
Ukrainanıñ birinci prezidenti, Üç taraflı kontakt gruppasında ukrain delegatsiyasınıñ başı Leonid Kravçuk, Qırımnıñ Rusiye tarafından faal arbiyleşüvi şaratinde Ukraina işğal etilgen yarımadağa Dnipro suvını bermeycek, dep qayd etti.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
