Ukrainanıñ birinci prezidenti, Üç taraflı kontakt gruppasında ukrain delegatsiyasınıñ baş Leonid Kravçuk, Qırımda suv qıtlığı meselesi daa da kerginleşecegine emin. Ve bu Rusiyeniñ Ukrainağa qarşı tecavuzınıñ artmasınıñ sebebi ola bile. Bunı o, Azatlıq Radiosına ayttı.
«Olar içün pek qıyın olacaq (Rusiye nezaretinde olğan Qırımnıñ başlıqları – QA). Olar suv meselesini quyular qazıp ve deñiz suvunı tatlılaştırıp al etmege isteyler. Buña pek çoq para kerek olacaq ve neticesi de ne olacağı belli degil. Qırımda suv meselesi kerginleşecek, dep tüşünem. Bu, Qırımnı suvnen temin etmek içün Rusiyege andan (Qırımdan – QA) Ukrainağa – Hersonğa, Mariupolğa yol açmaq içün sebep olacaq. Belki de bu, Rusiyeniñ Ukrainağa qarşı tecavuzınıñ artmasına da sebep olacaq. Amma böyle etip, Ukrainanı Qırımğa suvnı bermege mecbur etip olamaz», – dedi Kravçuk.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
