PEN Ukraine ve Vatandaş serbestlikleri merkezi içtimaiy ağlarda ukrainalı siyasiy mabüslerge qol tutuv fleşmobını başlattı. Teşkilâtçılarnıñ malümatına köre, aktsiya Mabüs oca kününe, ya da Boş yer kününe bağışlandı.
«İştirak etüv büyük ğayret talap etmey, amma bu kiçik adım bile qanunsız tutulğan ukrainalılarnıñ davaları aqqında hatırlata ve azat etilmelerini yaqınlaştıra», – dep aytıla haberde.
Fleşmobda iştirak etüv qaidelerini Facebooktaki PEN Ukraine saifesinden bilmek mümkün.
Aktsiyada ukrainalı oyucı, siyasetçi, jurnalist, eski siyasiy mabüsler endi iştirak etti.
Ukraina Yuqarı Radası insan aqları vekâletlisiniñ kâtibiyeti bildirgenine köre, 2020 senesi noyabr ayında Rusiye tarafından siyasiy sebeplerden taqip etilgen 130 Ukraina vatandaşı bar.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
