Bugünki künde Rusiye taravfından siyasiy sebeplerden taqip etilgen Ukraina vatandaşlarınıñ sayısı 130 ola, dep bildirdi Ukraina Yuqarı Radasınıñ insan aqları vekâletlisiniñ kâtibiyeti Azatlıq Radiosınıñ muracaatına cevap berip.
Berilgen malümatqa köre, 111-i (76 qırımtatarı da mında) azatlıqtan marum etüv yerlerinde (koloniya ve tahqiqat izolâtorlarında) buluna, 19-ınıñ areket serbestligi sıñırlandı (şartlı tarzda mahküm etildi, ev apsinde buluna, mecburiy tedaviylevde, memuriy nezaret altında qala).
«Rusiyede ve vaqtınca işğal etilgen Qırımda qanunsız tutulğan Ukraina vatandaşlarınıñ sayısı er vaqıt deñişe, çünki işğalci akimiyet yañı insanlarnı tutmağa ve yañı sahte cinaiy davalarnı açmağa devam ete, vekâletli ise soy-sop, advokat, aq qorçalayıcı teşkilâtlarından olarnıñ azat etilüvi içün tedbir almasınen bağlı yañı muracaatlar ala», – dep qayd etti ombudsmenniñ ofisi.
Bu yıl avgust ayında Yuqarı Radanıñ insan aqları vekâletlisi Lüdmila Denisova, Rusiye 97-si qırımtatarı olğan 133 Ukraina vatandaşını siyasiy sebeplerden tuta, dep bildirgen edi.
Vekâletliniñ kâtibiyeti Azatlıq Radiosına haber etkenine köre, sentâbr ve oktâbr aylarında üç Ukraina vatandaşı apishaneden azat etildi.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
2020 senesi yaz başında Ukraina tahqiqat izolâtorları ve apishanelerinde 300 rusiyeli bar edi.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
