Rusiye kontrolindeki Qırım Yuqarı mahkemesi sentâbrniñ 4-nde FSB idaresiniñ binası ögünde toplaşqan qırımtatar faallerine qarşı qabaatlav qararını çıqardı. Bu aqta «Qırım birdemligi» cemaat birleşmesi cemaat imayecisi Ayder Suleymanovnıñ malümatına esaslanıp bildirdi.
İmaye tarafınıñ mahkemede bildirgenine köre, fevqulâde vaziyetniñ peyda oluv telükesinde bar olğanda yüksek seviyeli azırlıq rejimini bozğanında qabaatını tanımay.
«Kollegiya Kiyev rayon mahkemesiniñ qararını deñiştirmeyip, qabaatlanğan er keske Rusiye Memuriy uquq bozuvları kodeksiniñ 20.6.1 maddesine istinaden («Fevqulâde vaziyet telükesi olğanda areket qaidelerine riayet etmeme») para cezalarını berdi», – dep aytıla haberde.
Ali Kerimov 10 biñ ruble, Lenur Yakubov 5 biñ ruble, Ruslan Umerov 1 biñ ruble, Siyar Gafarov 20 biñ ruble, Ayder Kadırov 5 biñ ruble, Abdumalin Susanov 7 biñ ruble ve siyasiy mabüsniñ babası Eskender Ahtemov 8 biñ ruble ödemeli.
Mahkeme iştirakçileriniñ aytqanına köre, mahkeme 5 daqqada qarar çıqardı.
Rusiye kontrolindeki Aqmescitniñ Kiyev rayon mahkemesiniñ qadısı Mihail Belousov sentâbrniñ 16-nda Qırımtatar Milliy Qurultayınıñ Merkeziy saylav komissiyasınıñ yolbaşçısı, faal Zair Smedlânı «yüksek seviyeli azırlıq rejiminiñ sıñırlavlarını bozğanında» qabaatlap, oña azamiy ceza berdi – 30 biñ ruble para cezası. Faal sentâbrniñ 4-nde Aqmescitteki Rusiye FSBsiniñ binası ögünde tutulğanlar arasında edi, dep bildire Qırım.Aqiqat mühbiri.
Rusiye polisi sentâbrniñ 4-nde Rusiye FSBsiniñ binası ögünde tutulğan qırımtatarlarğa qarşı 58 memuriy protokol tizdi.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Aralarında qırımtatar siyasetçisi ve faali Nariman Celâl bar. FSB malümatına köre, qırımtatarlar «bu yıl avgustnıñ 23-nde Qırımdaki gaz borusında diversiya yapqanları şübhesinen tutuldı. Rusiye müessisesi, tutulğanlar qabaatını itiraf etti, dep bildirdi». Bu malümatqa köre, «FSB tarqatqan sorğu videosında eki erkek kimden talimat alğanını ve Anğara köyünde gaz borusını nasıl patlatqanlarını tafsilâtlâca tarif etti».
