Qırımda koronavirus pandemiyası ve yarımadada epidemiologik vaziyet umumen fenalaşqanı sebebinden esli-başlı eali arasında vefat etkenlerniñ sayısı arta.
Bu aqta oktâbrniñ 14-nde Qırım ve Aqyardaki Rospotrebnadzor idaresiniñ yolbaşçısı Natalya Penkovskaya koronavirus yuqunçı ile küreş ştabınıñ toplaşuvında ayttı.
«Keçken afta vefat etkenler çoq oldı. 21 kişi vefat etti ve soñki eki afta sayılsa, qayd etilgen 89 ölümden 32-si soñki aftada qayd etildi. Hasta ve vefatnen bitken adiselerniñ 71%-ı – 60 yaşından büyük insanlardır», – dep qayd etti Penkovskaya.
Onıñ daa evel bildirgenine köre, Qırımda epidemiologik vaziyet fenalaşa – koronavirus hastalarınıñ sayısı arta, ORVİ, gripp ve hastahaneden tış pnevmoniya hastaları artmaqta.
Keçken künü Qırımda 163 koronavirus hastası qayd etildi. Umumen Qırımda 6331 yañı koronavirus hastası qayd etildi. 107-si çetelden keldi, 128-i qomşu Rusiyeden kelgenler ve olarnen alâqada olğanlar. 3533 insan tüzeldi. Bütün müddet devamında 3639 insan tüzeldi, 93 hasta koronavirustan vefat etti. Aqyarda 1385 insan yañı koronavirus yuqunçına oğradı, 911 kişi tüzeldi, 41 hasta koronavirustan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
