Qırım ve Aqyardaki Rospotrebnadzor idaresiniñ yolbaşçısı Natalya Penkovskayanıñ bildirgenine köre, Qırımda epidemiologik vaziyet fenalaşa – koronavirus hastalarınıñ sayısı arta, ORVİ, gripp ve pnevmoniya hastaları artmaqta.
Bu aqta o, oktâbrniñ 14-nde koronavirus yuqunçı ile küreş operativ ştabınıñ toplaşuvında ayttı.
«Vaziyet stabil degil ve hasta sayısı artmağa devam ete. Gripp ve ORVİ hastaları keçken aftağa baqqanda arta. Qırımda epidemiologik seviye 26% çoq, Aqmescitte 50%», – dep bildirdi Penkovskaya.
Onıñ malümatına köre, hastahaneden tış pnevmoniya hastalarınıñ sayısı da arta.
«Bugün olarnıñ sayısı 37% ola, keçken aftağa baqqanda daa az. Amma keçken afta Qırımda 1693 hastahaneden tış pnevmoniya qayd etildi. Keçken afta 1213 hasta bar edi, yani hasta sayısı arta ve 39,5% ola», – dep qayd etti Qırımnıñ baş sanitar ekimi.
Eñ çoq Aqmescitte, Canköy ve Qurman rayonlarında hastalanalar.
Keçken künü Qırımda 163 koronavirus hastası qayd etildi. Umumen Qırımda 6331 yañı koronavirus hastası qayd etildi. 107-si çetelden keldi, 128-i qomşu Rusiyeden kelgenler ve olarnen alâqada olğanlar. 3533 insan tüzeldi. Bütün müddet devamında 3639 insan tüzeldi, 93 hasta koronavirustan vefat etti. Aqyarda 1385 insan yañı koronavirus yuqunçına oğradı, 911 kişi tüzeldi, 41 hasta koronavirustan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
