Qırımda keçken künü daa 8 hasta koronavirustan vefat etti, dep haber ete Qırımnıñ Rusiye sağlıq nazirligi. Müessise monitoringine köre, umumen pandemiya başlağanından Qırımda 355 insan COVID-19-dan vefat etti.
«2104 kişi (covid) ambulator tedaviylevde, 2991 insan (covid ve pnevmoniya) hastahanede buluna, 82 kişi observatorlarğa alındı. Umumen 17950 COVID-19 hastası qayd etildi. Tüzelgen 13913 insan yiberildi», – dep aytıla Qırım sağlıq nazirliginiñ malümatında.
Keçken künü Qırımda 289 koronavirus hastası hastası qayd etildi. Bu pandemiya başlağanından berli qayd etilgen eñ büyük COVID-19 sayısı oldı.
Rospotrebnadzor, dekabr ayında avgust ayına köre koronavirus hastalarınıñ sayısı 13 qat arttı, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
