Avropa Şurası Parlament Assambleyasınıñ 7 aza memlketinden 27 azası Ukayina Yuqarı Radasınıñ "Ukrayinanıñ işğal etilgen topraqlarında qırımtatarlarğa qarşı sürekli siyasiy taqipler" aqqında beyannamesini desteklegen. Olarnıñ arasında Estoniya, Letoniya, Almaniya, Daniya, Azerbaycan ve Poloniya.
"Bu sentâbrniñ 21-nde qanunsız mahküm etilecek Nariman Celâl ve eki doğmuş qardaşlar Aziz ve Asan Ahtemovlarnıñ qanunsız ükmüne bağışlanğan vesiqadır. Bundan ğayrı Beyannamede işğalci devlet tarafından qırımtatar halqınıñ temsilcilerine qarşı sürekli taqipler ket-kete artaqanı içün Rusiyege bütün mümkün vastalarnen tazyıqnıñ artırılması talap etile", - dep haber ettiler Ukrayina prezidentiniñ Qırım MC-deki temsilciliginde.
Beyannamede qayd etilgeni kibi, Rusiyeniñ Ukrayinağa qarşı büyük istidâsı başlanğan soñ qırımtatarlarğa qarşı taqipler bayağı arttqan.
"Qırımda olğanı kibi rusiye işğalcileri Herson ve Zaporijjâ vilâyetiniñ muvaqqat işğal etilgen topraqlarında tamır qırımtatar halqınıñ temsilcilerini taqip eteler. 2022 senesiniñ sentâbr ayından bugünge qadar Rusiyeniñ Ukrayinağa qarşı silâlı tecavuzı neticesinde 106 qırımtatar (7-si Herson vilâyetinden) azatlıqtan marum etilgen", - deyler temsilcilikte.
İşğal etilgen Qırımda Anğaradaki «gaz borusında diversiya davası» boyunca ağa-qardaş Aziz ve Asan Ahtemovlarnen beraber makeme etilgen qırımtatar siyasetçisi ve faali Nariman Celâlnıñ ükmü sentâbrniñ 21-nde ilân etilecek.
Qırımtatar halqınıñ Milliy lideri Mustafa Cemilev Türkiye prezidenti Recep Tayyip Erdoğan ile qırımtatr faali ve siyasetçisi Nariman Celâlnıñ Rusiye apsinden azat etilmesi meselesini muzakere etemek niyetindedir.
Avgustnıñ 23-nde "Qırım platforması" halqara sammitiniñ iştirakçileri Rusiyeni tevqif etilgen qırımtatar siyasetçisi ve faali Nariman Celâlnı azat etmege çağırdılar.
Rusiye qabaatlayıcısı Qırımdaki «gaz borusında diversiya davasınıñ» üç mabüsi – faal Nariman Celâl ve qırımtatar faalleri, ağa-qardaş Asan ve Aziz Ahtemovlarnıñ 15 yıl koloniyada qalmasını talap etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
