Rusiyeniñ belli arbiy journalistı ve islâm meselesi eksperti Orhan Cemalniñ Merkeziy Afrika cumhuriyetinde (MAC) öldürilgeni Jurnalistler Birligini şaşırttı.
“Afrikadan kelgen haber şok alına ketirdi. Bütün jurnalist topluluğında (ve tek onda degil) belli olğan Orhan Cemal elâk oldı. Çekiş gruppasıniñ ölüm sebepleri aqqında tafsilâtlı malümat ve qoşma haber almaq içün MAC-ndeki Rusiye elçiliginen bağlanmağa tırışamız. Ölgenlerniñ qorantalarına, yaqınlarına öz taziyemizni bildiremiz. Elbette ki, bu şok”, - Rusiye jurnalistler Birliginiñ kâtibi Timur Şafirniñ sözlerinden alıntı ketire TASS haber agentligi.
Daa evel Rusiye Tışqı işler Nazirligi MAC-nde jurnalist şeadetnamesi olğan üç rusiye vatandaşınıñ öldürilgenini tasdıqladı. Diplomatik müessisesiniñ saytında bildirilgenine köre, üç adam elâk oldı, yanlarında sadece Kirill Radçenko, Aleksandr Rastorguyev ve Orhan Cemal adlarına jurnalist vesiqaları bar edi.
Orhan Cemal: «Moskova içün qırımtatarlar – istenilmegen azlıqtır»
Orhan Cemal 1966 senesi noyabrniñ 12-sinde doğdı. 1995 senesinden başlap “Nezavisimaya gazeta” («Независимая газета»), “Veçernâya Moskva” («Вечерняя Москва») gazetalarında çalıştı. Şimaliy Kavkaz, Afğanistan, İraq, Lübnan (Livan), Süriye (Siriya) ve il. memleketlerinde çalıştı. 2005 senesi “Tahqiqat komitet” («Следственный комитет») adlı Jurnalist tahqiqatları Agentligini tesis etti ve anda icra müdiri vazifesini becere edi.
