Kreml nezaretindeki Qırım Yuqarı mahkemesi, İslâm Terek rayonınıñ sakini Dilâver Gafarovnıñ cinaiy davası boyunca apellâtsiya muracaatını red etti ve sert rejimli koloniyada 10 yıllıq ükmüni amelde qaldırdı. Bunı "Qırım protsessi" portalı bildire.
Daa evel, Gafarovnı «Ukrainanıñ qanunsız silâlı birleşmesinde» iştirak etkeninde qabaatlanğanları bildirile edi.
Apellâtsiya baqıluvı vaqtında mabüs, başlanğıç mahkemeniñ ükmünen razı olmağanını ayttı.
Rusiye prokurorı, apellâtsiya muracaatınıñ qabul etmesine qarşı edi, çünki mahkeme ükmüni aqlı, bütün delillerni teşkerilgen ve qanuniy dep saya edi. Qabaatlav tarafınıñ vekili, bu fikirni tasdıqlamaq içün argument bermedi.
Oturış vaqtında Gafarovnıñ advokatı Aleksandr Muzıka, şikâyetniñ esas delillerini aytıp berdi: cinayetniñ yeri belgilenmegen, şaatlarnıñ şaatlıqlarında ve tintüv vaqtında tutulıp alınğan noutbuk teşkerüvinden kelişmemezlikler bar, ükümnin ösü esassız serttir.
Kreml kontrolindeki Qırımnıñ İslâm Terek rayon mahkemesi avgustnıñ 28-nde «Ukrainanıñ qanunsız silâlı birleşmesinde» iştirak etkeninde qabaatlanğan Dilâver Gafarovnıñ ükmüni çıqardı. Er adam 10 yıl sert rejimli koloniyada qalmasına ve bir yıl azatlığınıñ sıñırlanmasına üküm etildi. Prokuror ise 12 yılğa azatlıqtan marum etilmesini istedi.
2018 senesi oktâbrniñ 30-nda saba İslâm Terek rayonınıñ Jemçujina Krıma köyünde Rusiye quvetçileri yerli sakin, tükân satıcısı Dilâver Gafarovnıñ evini tintken edi.
2018 senesi noyabrniñ 1-nde Rusiye FSBsi bildirdi ki, Qırımda İslâm Terek rayonınıñ sakini «Ukrainada qanunsız silâlı birleşmelerde» iştirak etkeninde qabaatlanıp yaqalandı. Laf İslâm Terek rayonındaki Jemçujina Krıma köyüniñ sakini, tükân satıcısı Dilâver Gafarov aqqında kete edi. Daa soñra onı apiske aldılar. Ukraina Tış işler nazirligi bunı takbih etip, Rusiyeniñ yapqanlarına qarşı narazılıq bildirdi.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Qırımtatar Milliy Meclisi, bu meselenen bağlı bütün malümat Ukraina prezidenti Petro Poroşenko ve İç işler naziri Arsen Avakovğa berildi, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege çağırğan edi.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
