«Qırım birdemligi» cemaat birleşmesiniñ faalleri «Olarnıñ sesi ol» aktsiyası çerçivesinde qırımlı siyasiy mabüslerge qoltutmaq içün çıqarılğan 40-tan çoq video muracaatını qabul etti.
Bu aqta dekabrniñ 9-nda «Qırım birdemliginiñ» koordinatorı Server Çolakçik Qırım.Aqiqatqa bildirdi.
«Olarnıñ sesi ol» cemaat teşebbüsi çerçivesinde ilk video muracaatı yaqında – 2019 senesi noyabrniñ 25-nde – derc etildi, şimdi teşebbüs tarqala ve geografik sıñırlarını kenişlete. Bugün Qırım, Ukraina ve Türkiyeden 40-tan çoq video muracaatını endi aldıq. Tünevin İndoneziyadan video muracaatı keldi – siyasiy mabüs Riza Ömerovnıñ tuvğanlarından. Eminim, devamı bar», – dedi Çolakçik.
Aq qorçalayıcı, vatandaş jurnalisti Lutfiye Zudiyeva bunıñ kibi aktsiyalarnıñ siyasiy mabüslerniñ qorantaları içün ne qadar müim olğanını qayd etti.
«Elbet, bütün qorantalar bu qısqa, amma sıcaq ve samimiy muracaatlarnı bekley. Çünki aqayı ya da oğlunıñ adını qorçalamaq ne qadar müim olğanını añlaylar. Qırımda terrorizm ve ekstremizm ile küreş propagandası arqasında neler saqlanğanını köstermek ne qadar müim olğanını da añlaylar. Kimse devlet qabaatlayıcısı ve mahkeme organlarınıñ kâğıtlarına inanmay. Bu canavar repressiyalarına yarağan şekil köstermege tırışqan «quturğan printer» ne istese bastırsın», – dep ayta Zudiyeva.
Onıñ bildirgenine köre, aktsiyalarğa «farqlı insanlar» qoşula.
«Millet mensüpligi, dünya baqışları ceetinden farqlı insanlar. Amma olarnı adaletsiz şekilde apiske alınğanlar içün empatiya ve olarnıñ azat etilmesi içün küreş istegi birleştire», – dep qoştı aq qorçalayıcı.
Noyabr ayında «Qırım birdemligi» cemaat teşkilâtı «Olarnıñ sesi ol» aktsiyasını başlattı. Teşkilâtçılarnıñ ğayesine köre, er bir insan siyasiy mabüske qoltutmaq içün video muracaatını çıqara bile.
Faaller ilk video muracaatını endi derc etti. Belli Qırım ressamı Zarema Trasinova Bağçasaraydaki «Hizb ut-Tahrir davasınıñ» mabüsi Ernes Ametov aqqında tarif etti.
Siyasiy mabüs Emir-Usein Kukuğa qoltutuv video muracaatını sabıq Ukraina informatsion siyaseti naziriniñ muavini Emine Ceppar da çıqardı.
Yuqarı Radanıñ insan aqları vekâletlisi Lüdmila Denisova Türkiye ombudsmeni Şeref Malkoçqa Rusiye ve işğal altındaki Qırım apishanelerinde bulunğan ukrainalı siyasiy mabüslerniñ cedvelini berdi.
Sentâbrniñ 7-nde Ukraina ve Rusiye tutulğan şahıslarnı almaştırdı. 35 ukrainalı olğan uçaq «Borıspil» ava limanında qondı.
Ukraina prezidenti Volodımır Zelenskıynıñ Qırım.Aqiqatqa bildirgenine köre, qırımtatar faalleriniñ Rusiye apishanelerinden azat etilüvi Ukraina-Rusiye deñişiminiñ ekinci basamağı olacaq.
