«Qırım birdemligi» cemaat teşkilâtınıñ faalleri «Olarnıñ sesi ol» aktsiyasını başlattı. Teşkilâtçılarnıñ ğayesine köre, er bir insan siyasiy mabüslerge qoltutuv video muracaatını qayd ete bile.
«Siyasiy sebeplerden apiske alınğan er bir insannıñ azatlıqta onlarnen dostu, işdeşi ve tanışı bar, olar mabüsler aqqında daa çoq ayta bileler. Teşebbüske qoşulıv, bizge video muracaatlarıñıznı yollañız, mahsus hızmetler «terrorist» dep kimlerni apiske alğanını ikâye etiñiz», – dep aytıla «Qırım birdemliginiñ» haberinde Facebookta.
Faaller ilk video muracaatını endi derc etti. Belli Qırım ressamı Zarema Trasinova Bağçasaraydaki «Hizb ut-Tahrir davasınıñ» mabüsi Ernes Ametov aqqında tarif etti.
Yuqarı Radanıñ insan aqları vekâletlisi Lüdmila Denisova Türkiye ombudsmeni Şeref Malkoçqa Rusiye ve işğal altındaki Qırım apishanelerinde bulunğan ukrainalı siyasiy mabüslerniñ cedvelini berdi.
Sentâbrniñ 7-nde Ukraina ve Rusiye tutulğan şahıslarnı almaştırdı. 35 ukrainalı olğan uçaq «Borıspil» ava limanında qondı.
Ukraina prezidenti Volodımır Zelenskıynıñ Qırım.Aqiqatqa bildirgenine köre, qırımtatar faalleriniñ Rusiye apishanelerinden azat etilüvi Ukraina-Rusiye deñişiminiñ ekinci basamağı olacaq.
