Qurmandaki «Hizb ut-Tahrir davası» mabüsleriniñ soy-sopları ve yaqınları içtimaiy ağlarda «Olar terrorist degil» adlı fleşmob başlattı. Qırım sakinleri qırımtatarlarnıñ cinaiy taqibine ve Rusiye prokurorları istegen apis cezalarına qarşı narazılıq bildirmege tırışa.
Fotoresimni «Qırım birdemligi» cemaat birleşmesi derc ete.
«Fleşmobımıznıñ maqsadı – cemaatçılıqnıñ diqqatını Qırımdaki repressiyalar problemine celp etmektir. Biz olıp keçkenlerge razı olamaymız, bu taqipler tek qorantalarımızğa tesir etmedi, bugünde-bugün siyasiy sebeplerden yüzlernen semetdeşimiz qabaatlana ya da apiste yata. Ve, elbette, halqımıznıñ destegi bizim içün pek müim», – dep izaatladı Aliye Emiruseinova – dava mabüsi Rustem Emiruseinovnıñ ömür arqadaşı.
Qurmandaki «Hizb ut-Tahrir davası» mabüsleriniñ anaları Qırımda oğullarına çıqarılacaq ükümler arfesinde bir kişilik narazılıq aktsiyalarını ötkerdi.
Politsiya hadimleri Zure Emiruseinovağa qarşı protokol tizdi, çünki onıñ bir kişilik narazılıq aktsiyasını «miting» dep saya. Qadın gipertonik kriz ile hastahanege alındı.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi noyabrniñ 3-nde Qurmandaki «Hizb ut-Tahrir davasınıñ» mabüsleri Rustem Emiruseinov, Arsen Abhairov ve Eskender Abdulganiyevniñ ükmüni çıqarmağa planlaştıra. Prokuror qırımtatarlarnı qabaatlı tanıp, sert rejimli koloniyada qalmalarına üküm etmege talap etti: Rustem Emiruseinov içün 1,5 yıl nezaret ile 18 yıl apis, Arsen Abhairov içün 15 yıl, Eskender Abdulganiyev içün 16 yıl.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
