Link açıqlığı

Saatnıñ esas haberi

Qırımdaki «Hizb ut-Tahrir davası» mabüsiniñ anası keçirgen narazılıq aktsiyası: qadın hastahanege alındı


Rusiye politsiyası «Hizb ut-Tahrir davasınıñ» mabüsi Rustem Emiruseinovnıñ anasınıñ bir kişilik paketini toqtata, 2020 senesi oktâbrniñ 31-i
Rusiye politsiyası «Hizb ut-Tahrir davasınıñ» mabüsi Rustem Emiruseinovnıñ anasınıñ bir kişilik paketini toqtata, 2020 senesi oktâbrniñ 31-i

Qırımda Qurmandaki «Hizb ut-Tahrir davasınıñ» mabüsi Rustem Emiruseinovnıñ anası Zure gipertonik kriz ile hastahanege alındı. Onıñ oğlunıñ taqip etilüvine qarşı bir kişilik piketini Rusiye politsiyası toqtattı. Bu aqta advokat Lilâ Gemeci «Qırım birdemligine» bildirdi.

«Onı 200ge 100 qan basımı ile hastahanege ketirgenler. Politsiya hadimleri qıçırıp basqı yapqanlar, maşinağa minip, politsiya bölügine ketmesini talap etkenler. Onıñ areketlerini ne içündir «miting» dep adlandırğanlar, amma o bir özü edi. Rustem Emiruseinovnıñ ömür arqadaşı yavaş olıp laf etmege rica etken edi, çünki qadınnıñ yürek yetersizligi, gipertonik hastalığı bar ve şimdi çıqarılacaq üküm ögüne stress yaşamaqta, amma olar qulaq asmayıp, maneviy basqı yapmağa devam etkenler. Olarnıñ yapqanlarını şikâyet etecekmiz», – dep izaatladı Gemeci.

Berilgen malümatqa köre, politsiya hadimleri Zure Emiruseinovağa qarşı protokol tizdi, çünki onıñ bir kişilik narazılıq aktsiyasını «miting» dep saya.

Daa evel berilgen malümatqa köre, Qurmandaki «Hizb ut-Tahrir davası» mabüsleriniñ üç anası «Oğlum – terrorist degil» yazuvlı şiarlarınen bir kişilik narazılıq aktsiyalarına çıqtı.

Rusiye quvetçileri bir kişilik narazılıq aktsiyalarınıñ keçirilüvi sebebinden protokol tizilgenini resmiy şekilde bildirmey.

Rusiyeniñ Rostov-na-Donu şeerindeki Cenübiy okrugınıñ arbiy mahkemesi noyabrniñ 3-nde Qurmandaki «Hizb ut-Tahrir davasınıñ» mabüsleri Rustem Emiruseinov, Arsen Abhairov ve Eskender Abdulganiyevniñ ükmüni çıqarmağa planlaştıra. Prokuror qırımtatarlarnı qabaatlı tanıp, sert rejimli koloniyada qalmalarına üküm etmege talap etti: Rustem Emiruseinov içün 1,5 yıl nezaret ile 18 yıl apis, Arsen Abhairov içün 15 yıl, Eskender Abdulganiyev içün 16 yıl.

2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.

Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

XS
SM
MD
LG