Mayısnıñ 26-nda Kyivdeki Halq hocalığı ğalebeleriniñ sergileri (VDNH) kompleksinde olğan «Okean ne molçit» («Okean susmay») kontsertinde Svâtoslav Vakarçuk yırlardan birini qırımtatarlarğa bağışladı.
«Bizim, ukrain ve qırımtatarlarnıñ, taqdirleri pek oşay. Bizni er vaqıt sıñırlamağa tırışqan ediler. Tarih boyunca bizge biz olmağa bermege istemegen ediler. Orta Asiyağa sürgün etilgen ve Vatanlarına qaytıp olğan ve medeniyetini inkişaf ettirmege devam etken halqqa büyük ürmet bildirem. Bugün, ne yazıq ki, kene Rusiye ilhaq etken Qırımda tarih tekrarlanğanını köremiz. Men em qırımtatarlar, em ukrainlerge sabırlı olmağa, bir olmağa tileyim. Beraber olsaq, mıtlaqa yeñermiz, tuvğan toprağımızğa qaytıp, güzel bir memleket qurarmız», – dep ayttı Vakarçuk Ukraina informatsion siyaseti naziriniñ birinci muavini Emine Ceppar derc etken videoda.
Bundan soñ o, qırımtatarlarnıñ mustaqillik oğrunda küreşine bağışlanğan yırnı icra etti.
«Bu yır bir qoranta, qırımtatarlar, ukrainler ve diger milletler yaşağan büyük bir memleket içün küreşke bağışlana. Biz yeñilmemiz», – dedi Vakarçuk ve «Kolı tobi vajko» («Qıyın olsa») yırını yırladı.
Bundan ğayrı, qayd etilgenine köre, «Okean Elzı» lideri yırnı yırlamazdan evel Stalin rejimi kerçekleştirgen qırımtatar genotsidiniñ 75 yılına bağışlanğan «Hırsızlanğan Qırım. Sürgünlik ikâyesi» sergisi aqqında tarif etti. O, Ukraina prezidentiniñ qırımtatar halqı işlerinden vekâletlisi Mustafa Cemilev ve informatsion siyaseti naziriniñ birinci muavini Emine Cepparnen beraber sergini ziyaret etken edi.
«50 insan tarafından azırlanğan, Qırım ve Ukrainanı birleştirgen, sürgünlikni tek raqam ve malümatnen degil, duyğu ve sımalar, timsal ve sesler, ışıq ve renknen ikâye etken küçlü bir leyhanıñ lâyıq soñu. Bütün taqım içün işniñ lâyıq bir soñu», – dep yazdı Ceppar Facebookta.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
