Odesanıñ Primorskiy rayon mahkemesi iyülniñ 25-nde İzmail limanında yaqalanğan NIKA SPIRIT Rusiye tankerini tevqif etti. Bu aqta Ukraina baş prokurorı Anatoliy Matios bildirdi.
«Ukraina mahkemesi Keriç boğazında ukrain arbiy gemilerini blok etken NEYMA (NIKA SPIRIT adını alğan – QA) olaraq belli Rusiye tankerini iyülniñ 25-nde tintken arbiy prokurorlar ve Ukraina telükesizlik hızmeti tahqiqatçıları areketleriniñ qanunğa uyğun olıp olmağanını teşkerdi. Mahkeme işbu muracaatnı baqıp, mezkür gemi ve tintüv vaqtında alınğan bütün vesiqalarnı tevqif etti. Bunı yaptıq. Noqta!», – dep yazdı Matios Facebookta.
İyülniñ 25-nde Ukraina telükesizlik hızmeti ve arbiy prokuratura Keriç boğazında «Nikopol», «Berdânsk» ve «Yañı Qapu» ukrain arbiy gemilerini blok etken «NEYMA» Rusiye tankerini tuttı.
Ukraina telükesizlik hızmetiniñ malümatına köre, Rusiye Keriç boğazındaki adiseden soñ NEYMA Rusiye tankeriniñ adını NIKA SPIRIT qoydı. Rusiye arbiy reberliginiñ 15 memurına, şu cümleden kontr-admiral, eki admiral muavini ve general-polkovnikke şübheli olğanları haber etildi.
MarineTraffic malümatına köre, tanker İzmail limanına Rusiyeniñ «Kavkaz» limanından kele edi.
Rusiye Tış işler nazirligi, «kerekli tedbir almaq içün» tanker tutulğanınıñ «tafsilâtlarını» ögrene.
Daa soñra Ukraina telükesizlik hızmeti tutulğan Rusiye tankeriniñ ekipajını yiberdi, dep bildirdi, çünki taqım «deñiz uquqı ve Ukraina qanunlarını bozmadı». Şu sebepten olarnı tutmaq içün sebep yoq, dep aytıla iyülniñ 25-nde aqşam aydınlatılğan UTH beyanatında.
2018 senesi noyabrniñ 25-nde Rusiye arbiyleri Qırım yalısında Odesadan Mariupolgen ketken Ukraina Arbiy-deñiz quvetleriniñ üç gemisi – «Berdânsk» ve «Nikopol» katerleri ve «Yañı Qapu» buksirine – aselet çarpıp zapt etken edi.
Rusiye FSBsi Ukraina gemilerine qarşı silâ qullanğanını tasdıqladı, müessise üç ukrain cenk gemisi «Rusiye devlet sıñırından qanunsız keçti», dep israr ete.
Qırımdaki Rusiye mahkemeleri 24 ukrainalı arbiyni apiske alıp, olarnı Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatladı. Olar 6 yılğa qadar apiske alına bile. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
