İzmailde tutulğan NEYMA Rusiye tankeriniñ ekipajı Moskvağa qayta, Ukrainada olarğa qarşı bir qabaat aydınlatılmadı. Bu aqta Rusiye kütleviy haber vastaları bildire.
Aynı vaqıtta, TASS Rusiye haber agentliginiñ malümatına köre, gemi İzmailde qala.
«Gemi saibiniñ qararı ile ekipaj evge qaytqanını ögrendik, gemi ise şimdilik İzmailde qala», – dep ayttı Rusiyeniñ Kyiv elçihanesiniñ matbuat attaşesi Denis Golenko «İnterfaks» Rusiye haber agentligine.
Rusiye insan aqları vekâletlisi Tatyana Moskalkovanıñ bildirgenine köre, ekipaj Moldovağa doğru yol aldı, andan ise Moskvağa uçaqnen ketecek.
Ukraina uquq qoruyıcı organları bu malümatnı daa izaatlamadı.
Ekipaj azalarınıñ tam sayısı alâ daa belli degil. «İnterfaks» Rusiye haber agentliginiñ malümatına köre, tankerde 15 insan bar edi.
BBC Ukraina hızmetiniñ malümatına köre, gemide ekipajnıñ 10 azası bulunğan edi.
Ukrainanıñ baş arbiy prokurorı Anatoliy Matios deñizcilerniñ 7 Rusiye pasportı körüngen fotoresimni Facebook saifesinde derc etti.
Ukraina telükesizlik hızmeti ve arbiy prokuratura Keriç boğazında «Nikopol», «Berdânsk» ve «Yañı Qapu» ukrain arbiy gemilerini blok etken «NEYMA» Rusiye tankerini tuttı. Bu aqta iyülniñ 25-nde UTH matbuat hızmeti bildire.
Ukraina telükesizlik hızmetiniñ malümatına köre, Rusiye Keriç boğazındaki adiseden soñ NEYMA Rusiye tankeriniñ adını NIKA SPIRIT qoydı. Rusiye arbiy reberliginiñ 15 memurına, şu cümleden kontr-admiral, eki admiral muavini ve general-polkovnikke şübheli olğanları haber etildi.
MarineTraffic malümatına köre, tanker İzmail limanına Rusiyeniñ «Kavkaz» limanından kele edi.
Rusiye Tış işler nazirligi, «kerekli tedbir almaq içün» tanker tutulğanınıñ «tafsilâtlarını» ögrene.
2018 senesi noyabrniñ 25-nde Rusiye arbiyleri Qırım yalısında Odesadan Mariupolgen ketken Ukraina Arbiy-deñiz quvetleriniñ üç gemisi – «Berdânsk» ve «Nikopol» katerleri ve «Yañı Qapu» buksirine – aselet çarpıp zapt etken edi.
Rusiye FSBsi Ukraina gemilerine qarşı silâ qullanğanını tasdıqladı, müessise üç ukrain cenk gemisi «Rusiye devlet sıñırından qanunsız keçti», dep israr ete.
Qırımdaki Rusiye mahkemeleri 24 ukrainalı arbiyni apiske alıp, olarnı Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatladı. Olar 6 yılğa qadar apiske alına bile. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
