Link açıqlığı

Saatnıñ esas haberi

Ukraina telükesizlik hızmeti: Keriç boğazında ukrain gemilerini blok etken Rusiye tankeri tutuldı


Ukraina telükesizlik hızmeti ve arbiy prokuratura Keriç boğazında ukrain arbiy gemilerini blok etken «NEYMA» Rusiye tankerini tuttı. Bu aqta iyülniñ 25-nde UTH matbuat hızmeti bildire.

Müessiseniñ qayd etkenine köre, Ukraina sıñırcılarınıñ malümatına köre, iyülniñ 24-nde İzmail limanına Rusiye bayrağı altında «NIKA SPIRIT» tankeri kirdi. Bu Keriç boğazını qapatmaq içün qullanılğan «NEYMA» tankeridir. UTH, Rusiyede «NEYMA» «NIKA SPIRIT» adını aldı, dep bildire.

«Mahkemeden evelki tahqiqat vaqtında belli oldı ki, Rusiye FSBsi yüksek reberliginiñ doğru emrine köre FSB Sıñır hızmetiniñ vekilleri Keriç boğazında «Nikopol», «Berdânsk» ve «Yañı Qapu» ukrain arbiy gemilerine qarşı silâlı ücüm yaptı», – dep aytıla haberde.

Berilgen malümatqa köre, «NEYMA» tankeri tarafından Keriç boğazında Keriç-Yeñiqale kanalınıñ blok etilmesi boyunca Arbiy prokuraturanıñ reberligi altında UTH tahqiqatçıları mahkemeden evel tahqiqatnı başlattı.

Rusiye arbiy reberliginiñ 15 memurına, şu cümleden kontr-admiral, eki admiral muavini ve general-polkovnikke şübheli olğanları haber etildi.

UTH malümatına köre, «dava malümatlarını ögrenmek içün» tutulğan tankerde tintüv keçirildi, vesiqalar alındı, zıddiyet vaqtında radio subetleriniñ qaydları, bort defterleri alındı. Ekipaj azaları sorğuğa çekildi.

Rusiye quvet müessiseleriniñ İzmail limanında Rusiye gemisiniñ tutuluvınen bağlı açıq izaatları yoq.

2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.

Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».

Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.

Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.

Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.

XS
SM
MD
LG