Bunı Çubarov Norvegiya Tış işler naziri Espen Barta Eyde ve Emek ve içtimaiy integratsiya naziri Tonye Brenna ile körüşüvde soñ ayttı.
Onıñ bildirgenine köre, Norvegiya Tış işler naziri eyyetniñ Ukrayina ziyaretiniñ neticeleri parlament içün esabat şeklinde tertip etilecek, Qırımda qırımtatarlarnıñ taqip etilüvine diqqat ayırılacaq, dep işandırdı.
Bundan ğayrı, Çubarovnıñ aytqanına köre, Norvegiya memurları Qurultay ve Meclis kibi qırımtatar temsiliy organları aqqında soradı. Çubarov olarnı memleketniñ tamır halqını temsil etken Norvegiyanıñ Saam parlamentine oşattı.
Oktâbrniñ 9-nda Ukrayina Yuqarı Radası çetel devletlerniñ ükümetleri ve parlamentlerini 1944 senesi qırımtatarlarnıñ Qırımdan sürgün etilmesini qırımtatar halqınıñ genotsidi olaraq tanımağa çağırğan edi.
Dekabrniñ 18-nde Çehiya Senatı 1944 senesi qırımtatar sürgünligini genotsid olaraq tanıdı. Qayd etilgen 74 senatordan 70-i bu qararğa rey berdi.
Oktâbrniñ ortasında Estoniya parlamenti 1944 senesi sovet rejimi tarafından qırımtatar halqınıñ sürgünligi genotsid olaraq tanılğanı aqqında beyanatnı tasdıqladı.
Qırımtatar halqınıñ lideri Mustafa Cemilev Azatlıq Radiosına bergen intervyüsında Çehiya akimiyeti başqa memleketlerni 1944 senesi qırımtatar halqınıñ sürgünligini genotsid olaraq tanımağa iqna etmek içün öz tesirini qullanmağa söz berdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
