Seyitler (Nijnegorskoye) rayonınıñ Oy Quyu (Vladislavovka) köyünde musulman qabristanında baştaşlarnı avdardılar. Bunı Qırım.Aqiqat mühbirine advokat Emine Avamileva haber etti.
Avamilevanıñ aytqanına köre, qırımtatarlar küç organlarına muracaat etti, amma olar bunı "aile içindeki dava" saya.
"Mayıs 16-sında adamlar mezarlıqta avdarılğan qabirlerni kördi. 5-6 baştaş. Olar küç organlarına muracaat etkende, politsiya bunı aile içindeki dava kibi saydı. Sanki bu nasıldır biri-birine yapılğan duşmanlıq ve asıl milletlerara nefret çıqaruvı degil. Olar sadece bu meseleni yoq etmege tırıştılar", - dedi advokat.
Avamileva, bu provokatsiya da ola bile dep tüşüne. Çünki yıqtırılğan baştaşlar qırımtatarlarnıñ matem künü ögünde peyda oldı.
"Qoranta içinde ne davaları olmasa da, qırımtatarlarnıñ böylece onı çezmege, mezarlarnı aramlamağa adeti yoq. Böyle şey em de qırımtatarlarnıñ tarihında, em de tarihiy hronikada yoq. Bizde, musulmanlarda, böyle tsinik, vandal tarzında qabirlerni aramalamaq kibi şey yoq", - qayd etti Avamileva.
Qırımnıñ uquq qoruyıcıları ve yerli akimiyet vekilleri adiseni izaatlamay. Diger menbalar da bu malümatnı tasdıqlamay.
2019 senesi noyabr ayında işğal altındaki Qırımda musulman mezarlığına yapılğan daa bir vandallıq areketi aqqında belli oldı. Qırımtatar faali Zair Smedlâniñ haber etkenine köre, Qurman rayonınıñ Petrovka köyünde kimligi belli olmağanlar mezarlıqta baştaşnı bozdı.
İyülniñ 17-nde Qırımnıñ Yedi-Quyu rayonında Bagerovo qasabasınıñ mezarlığında 15 baştaş bozuldı, dep haber etilgen edi. Daa soñra bunı yerli gençler yaptı, dep bildirildi.
Bundan evel iyünniñ 18-nden 19-na keçer gecesi Qarasuvbazarda kimligi belli olmağanlar cami qorasına natsist timsallerini sızdı, dep haber etildi. 2018 senesi fevral ayında ise Aqmescitniñ «Strelkovaya» qasabasında vandallar cami mülkine zarar ketirgen edi.
