Raatlıq künleri işğal altındaki Qırımda musulman mezarlığına yapılğan daa bir vandallıq areketi aqqında belli oldı. Qırımtatar faali Zair Smedlâniñ haber etkenine köre, Qurman rayonınıñ Petrovka köyünde kimligi belli olmağanlar mezarlıqta baştaşnı bozdı.
«Qabaatlılar tapılıp cezalanacağına inanmayım, em de politsiya hadimlerinden biri baştaş yel olğanı içün yıqıla bile dep aytqanını eşitken soñ», – dep qayd etip, faal mezarlıq fotoresimlerini derc etti.
Qırımnıñ uquq qoruyıcıları ve yerli akimiyet vekilleri adiseni izaatlamay. Diger menbalar da bu malümatnı tasdıqlamay.
İyülniñ 17-nde Qırımnıñ Yedi-Quyu rayonında Bagerovo qasabasınıñ mezarlığında 15 baştaş bozuldı, dep haber etilgen edi. Daa soñra bunı yerli gençler yaptı, dep bildirildi.
Bundan evel iyünniñ 18-nden 19-na keçer gecesi Qarasuvbazarda kimligi belli olmağanlar cami qorasına natsist timsallerini sızdı, dep haber etildi. 2018 senesi fevral ayında ise Aqmescitniñ «Strelkovaya» qasabasında vandallar cami mülkine zarar ketirgen edi.
