Nikita nebatat bağçasında “Lâle numayışı”nıñ açılışı aprelniñ 10-una niyetlenilgen. Bağçanıñ matbuat hızmeti bildirgeni kibi, aprel devamında 247 lâle çeşiti çeçeklenecek.
“Bu, kerçekten, dünyanıñ eñ güzel zemaneviy ve eskiden qalğan lâle türleridir. Olardan beşini Nikita nebatat bağçasınıñ işçileri saylap, aşılap, östürip çıqardı. Bu yıl “Lâle paradı”mıznıñ başında ise General de Wet lâle çeşiti olacaq, onı 1904 senesi felemenk selektsionerleri işlep çıqardı”, - dep añlattı bağça müdiri Yuriy Plugatar.
Matbuat hızmetiniñ malümatına köre, nebatat bağçasında lâleden ğayrı, susam, nargüz, keriya, fotiniya, yapon ayvası, sakura, glitsiniya, magnoliya ve gül çeçekleri açtı ya da yaqın vaqıtta açacaq.
Nikita nebatat bağçasında baarde, “lâle numayışı” vaqtında yüz biñge qadar lâle çiçegi açacaq. Bu aqta bağça müdiri Yuriy Plugatar bildirdi.
2016 senesi baar sergisinde 37 biñ çiçek saçılğanı bildirile, 2017 senesi ise bu raqam ekiden ziyade kere çoqlaştı - 73 biñ, 2018 senesinde - 85 biñ çiçek saçıldı.
