Rusiye Devlet Dumasınıñ "Qırım ve Aqyarğa ketirilgen zararna qıymet kesken" iş gruppası, şimdiki malümatqa köre, "Ukrainadan tiygen zarar" 2 milliard dollardır, dep bildirdi. Bu aqta iş gruppasınıñ başı, Rusiye Devlet Dumasınıñ vitse-spikeri İvan Melnikov bildirdi.
"Bu tek üç komitetniñ ve tek bir qaç yönelişniñ misalleri. Amma biz köremiz, ormannıñ kesilmesi, mesken-kommunal hocalığınıñ sisteması ve içtimaiy müessiselerniñ vaziyeti 2 milliard dollarnıteşkil ete", - dep yaza Melnikovnıñ sözlerinden "İnterfaks".
Onıñ aytanına köre, bu raqamlarnı, ilhaq etilgen Qırımnıñ akimiyet organlarınen işbirlik yapıp belgilediler.
Daa evel Qırımnıñ Rusiye parlamenti 1991 senesinden 2013 senesine qadar «Ukrainadan kelgen zarar» miqdarı 2,5 trln ruble teşkil etti, dep bildire edi.
Martnıñ 15-nde Devlet Dumasınıñ Şurası ve Qırımnıñ Rusiye parlamenti ve Aqyar ükümetiniñ toplaşuvında Volodin Rusiye Ukrainadan Qırım onıñ terkibinde bulunğan 25 yıl içün ivaz tölemesini talap etmeli, dep bildirdi.
Martnıñ 20-nde Rusiye Devlet dumasınıñ reisi Vâçeslav Volodin Rusiye parlamentiniñ alt palatasında «Ukrainanıñ areketlerinden Qırım yarımadasınıñ iqtisadiyatına ketirilgen zararğa» qıymet kesecek mahsus işçi gruppa qurulğanını bildirgen edi.
Bu sene aprel ayında Kreml kontrolindeki Qırım parlamentinde «Ukrainadan kelgen zarar» talili boyunca işçi gruppanıñ birinci toplaşuvı keçirildi.
Ukraina Tış İşler Naziri Pavlo Klımkın Facebookta,Ukraina yarımadağa ketirgen “zararı”nı talil etecek mahsus iş gruppasınıñ tizilüvi aqqında Rusiye Devlet Dumasınıñ qararını, “yañı ğayeler olmağanıñ neticesi”, dep ayttı ve qayd etti ki, Rusiyeniñ bir qaç asırlıq Ukraina işğali içün tazminat, yani zararlarnıñ ödevini talap etmege kimseniñ aqlına ne içündir kelmegen.
