Bu yıl mayıs ayında teşkil etilgen, “Qırım ğayesi” içtimaiy areket iyülniñ 29-ına Qarasuvbazar şeerinde “qırımtatar milliy areketniñ ğayrıdan tiklenmesi"ni öz esas maqsadı kibi belgiledi. Onı yerine ketirmek içün, bütün Qırım boyunca faaller toplaşuvları keçirilecek. Bunı Qırım.Aqıqatnıñ muhbiri haber etti.
Qırımtatar milliy Meclisniñ faaliyeti yasaqlanğanından sebep, Qırımda “tıştan kelgen küçlerge halqnıñ demokratik ve azatlıqsever şuurını baştırmağa bermeycek qırımtatar milliy areketniñ faalleşmesi kerek”, - dep qayd etti iştirakçiler.
“Zemaneviy Qırımda bayağı faal qırımtatar bar. Aynı zamanda, qırımtatarlarnıñ ekseriyeti tarafından passivlikke yol bermemek kerek. “Qırım ğayesi”niñ esas vazifesi – qırımtatar milliy areketniñ faalleştirüvi, maqsadı ise – öz azatlıq ve aq-uquqlarımıznı qorumaq içün milliy areketniñ evelki seviyesini ğayrıdan yaşatmaq”, - dep toplaşuvda belgiledi uquqqoruyıcı Abdureşit Cepparov.
“Qırım ğayesi”niñ falleri “yerli faallernen körüşip, toplaşuvlar keçirecek”, - dep bildirdi toplaşuvnıñ iştirakçisi Rolan Osmanov.
“Yaqın tarihımızda olıp keçkeni kibi, toplaşuvlarımıznı evlerde keçirecekmiz. Ana-babamnıñ evinde muhtazam tarzda böyle toplaşuvlar keçkeni, anda müim meseleler muzakere etilgeni alâ daa aqlımda bar. Şimde ise bu adetni ğayrıdan yaşatmaq kerek, milliy areketni de canlandırmağa ihtiyacımız bar, çünki Qırımdaki bütün qırımtatarlar içün şimdi qıyın bir zamandır”, - dey Osmanov.
Mayısnıñ 27-sine Qarasuvbazarda Qırım faallerniñ toplaşuvında “Qırım ğayesi” içtimaiy areketniñ yaratması aqqında qarar alındı.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqası olğanında şeklengen musulmanlarnıñ evlerinde sıq-sıq tintüvler keçirilmege başladı.
