Mayısnıñ 27-nde Qarasuvbazarda qırımlı fallerniñ körüşüvinde «Qırım ğayesi» cemaat areketi teşkil etilecegine qarar berildi dep haber ete Qırım.Aqiqat muhbiri.
«Mayısnıñ 27-nde Qarasuvbazarda Qırımnıñ çeşit regionlarından kelgen faller toplaştı. Qırımdaki vaziyetni muzakere etüv esnasında «Qırım ğayesi» adlı cemaat areketi teşkil etilecegine qarar berildi. O açıq bir areket olacaq ve kelecekte yarımadanıñ ictimaiy ömürinde büyük rol oynaycaq degen maqsatnen teşkil etile», – dep ikâye etti Qırım.Aqiqatqa yañı ictimaiy areket teşkil etilüviniñ teşebbüsçilerinden biri olğan İnsan aqları boyunca Qırım kontakt gruppasınıñ koordinatorı Abdureşit Cepparov.
Adliyeci Mammet Mambetovnıñ sözlerine köre, yarımadada yaşağan qırımtatarlarnıñ bütün problemalarını çezmege yardım etmek maqsadınen Qırımda böyle bir ictimaiy birleşmeniñ teşkil etilmesine kerek duyılğan.
Faaller «Qırım ğayesi» areketi nenen oğraşacağını dair bir izaat bermedi.
Aprelniñ 9-nda Aqyarda İnsan aqları boyunca Qırım kontakt gruppası ilk defa Qırımda Rusiye telükesizlik organları tarafından tevqif etilgen bütün musulmanlarnıñ aileleriniñ körüşüvini teşkil etken edi. Anda qabaatlanğan şahıslarnıñ adliyecileri de kelgen edi. O zaman çıqış yapqan İnsan aqları boyunca Qırım kontakt gruppasınıñ adliyecisi Emil Kurbedinov bu kün Qırımda tevqif etilgen musulmanlarnıñ aileleri ortaq areket etecek bir meydanğa çevirilgenini aytqan edi.
