Lina Kostenko, Yuriy Andruhoviç, İvan Malkoviç, Aleksandr Roytburd ve daa 50-den ziyade ukrain yazıcı, sanat ve cemaat erbapları, bütün ukrain mabüslerniñ azat etilmesi içün açlıq tutqan, ukrain rejissörı Oleg Sentsovğa muracaat etti.
“Saña oşağan insanlar bu dünyada pek az. Bilemiz ki, özün içün yahşı laflar eşitmege iç sevmeysiñ. Amma sen kibi küçlü ve iradeli insan bizge sağ kerek. Qapatılğan balalarımıznıñ serbestligi oğrunda küreşimizni devam etmek içün. Sen bizim içün sağ qalmaq kereksiñ. Saña ihtiyacımız bar. Apiste olsañ bile, bu küreşnen epimizni birleştirip oldıñ”, - dep yaza, Harkiv uquq-qorçalav teşkilâtınıñ reisi Yevgeniy Zaharov öz Facebook saifesinde yerleştirgen, mektüpniñ müellifleri.
Mektüpte, sovet lagerleriniñ çoq yıllıq mabüsi olğan, qırımtatar halqınıñ yolbaşçısı - Mustafa Cemilevniñ ikâyesi de añılğan.
“Mustafa eñ uzun açlığını tutqanda ve ayatından vazgeçmege azır olğan vaqıtta, Andrey Saharovnıñ mektübinen onıñ anası ve qardaşı körüşüvge kele. O mektüpte Saharov Mustafanı açlıqnı toqtatmağa rica ete. Bütün fikirdeşleri ve yaqınları içün onıñ, qaramaniy olsa da, ölümi degil, ayatı müim olğanını aqqında yaza. Mustafa Saharovnıñ ricasını red etip olamay. O, açlıqnı toqtata. Oleg, biz öz ricamızğa Andrey Saharov ve Mustafa Cemilevniñ ricalarını da qoşamız. Bu qaramanlıqnı bizim içün yap”, - dep çağıra Olegni Ukrainanıñ onlarca namlı insanı.
20 yılğa qapatılğan ukrain rejissörı Oleg Sentsov, Moskova tarafından apis etilgen bütün ukrain mabüsleriniñ azat etilmesi talabınen, mayısnıñ 14-üne açlıqnı başladı. Şimdi o Şimal Qutup Tögeregi yanındaki koloniyada tutulmaqta.
Sentsovdan ğayrı, taqipke qarşı açlıq protestini Qırım mabüsi Vladimir Baluh, Rusiyede mahküm etilgen ukrainalı Stanislav Klıh, Donetsk boyeviklerniñ esiri - jurnalist ve Azatlıq Radıosınıñ müellifi Stanislav Aseyev (tahallüsi - Stanislav Vasin) ilân ettiler.
Uquq qoruyıcılarnıñ bildirgenine köre, Rusiyede ve işğal etilgen Qırımda episi olıp 70-ge qadar siyasiy mabüsler tutulmaqta. Bazıları açlıq protestleri ilân etti.
