Qırımnıñ Rusiyege tabi ükümetiniñ qırımtatarlarğa yerli ükümet organlarında kvotalar ayırılmasına dair müzakerelerniñ ihtimalı aqqında bildirüvleri, Rusiyeniñ tamır halqınıñ meselelerine diqqat ayırğanını köstermek maqsadınen yapıla. Bunı Qırım.Aqiqat Radiosı efirinde Ukraina siyasiy talilcisi Yuliya Tişçenko, Kremlniñ kontroli altında olğan Qırım Devlet şurası reisiniñ muavini Remzi İlyasovnıñ bu mevzudaki sözlerini izalarken bildirdi.
Siyasetşınas: «Bu, Rusiyeniñ nevbetteki bir qırımtatarlarnıñ közüne kirüv oyunı ile bağlı meseledir. Rusiye rehberleri, Gaadaki BMTniñ Halqara mahkemesinde Rusiye tarafından diskriminatsiyağa qarşılıq kösterüv maddesiniñ bozuluvı ile bağlı olğan bir sıra ükümlerniñ baqılğanını, ve şu cümleden qırımtatarlarnıñ temsiliy teşkilâtı – aynı şu Meclis meselesi boyunca deral alınacaq tedbirlerniñ mevcüt olğanını yahşı añlaylar. Rusiye, cümleden işte bu menfiy dalğanı yatıştırmaq ve qırımtatarlarnıñ meselelerine diqqat ayırğanını köstermek istey», – dep qayd etti.
İyülniñ başında Kremlniñ kontroli altında olğan Qırım Devlet şurası reisiniñ muavini Remzi İlyasov «Argument nedeli – Krım» neşirine, ükümet organlarında qırımtatarlarğa kvotalarnı ayıruv aqqında meseleniñ mahsus müzakerege muhtac olğanını bildirdi ve Rusiyedeki Karaçay-Çerkes ve Kabardin-Balkar cumhuriyetleriniñ tecribesine atıfta bulundı.
Qorımtatar Milliy Meclisi Rusiye territoriyasında ve ilhaq etilgen Qırımda 2016 senesi aprel 26-da Kremlniñ kontroli altında olğan Qırım Yuqarı mahkemesiniñ qararınen yasaq etildi. Meclisniñ imayesi Rusiye Yuqarı mahkemesine apellâtsiya berdi, lâkin 2016 senesi sentâbr 29-da o, red etildi.
2017 senesi aprel 19-da Halqara mahkeme, Ukrainanıñ Rusiyege qarşı açqan davası boyunca ara qararı çıqardı. Gaagadaki mahkeme Rusiyeni, qırımtatarlar ve etnik ukrainlerge qarşı aqlarınıñ sıñırlanmasını toqtatmaq ve ilhaq etilgen Qırımda Meclisni ve ukrain tilinde oqutuvnı ğayrıdan tiklemek mecbur etti. Rusiye bu talaplarnı ale daa yerine ketirmedi.
