Vilnüste Litva prezidenti Dalâ Gribauskayte Qırımtatar Milliy Meclisi reisiniñ muavini İlmi Umerovnı Litvağa qarşı yararlıqları içün Ordenniñ Rıtsarlar haçı ile mükâfatladı.
Qırım.Aqiqat muhbiriniñ bildirgenine köre, tantanalı tedbir iyül 6-da prezident sarayında keçti. Umerovdan ğayrı ordenler ile daa 56 kişi – Litvanıñ medeniyet erbapları, ekimleri, arbiyleri ve siyasetçileri mükâfatlandı.
İlmi Umerov, 28 yıl evelki vaqialar içün mükâfatlandı. 1990 senesi aprel 18-den iyül 2-ge qadar SSCB, müstaqillikke endi irişe bilgen Litvağa qarşı iqtisadiy blokada yaptı. O zaman İlmi Umerov bir gruppa qırımtatarlar ile blokadanı yırtıp keçti ve qırımtatar halqı adından küçük bir hümanitar yardım – ğıdalav maddeleri, urba ve yaqarlıq ketirdi. Bu hümanitar yükniñ toplanmasında bir çoq qırımtatar qorantası iştirak etti – aş ve urbanı çuvallarğa yerleştirip, yanlarına qol tutuv sözleri ile mektüpler qoya ediler.
Litva ükümeti bu yardımğa cevaben qırımtatarlarğa bir qaç alitus evini bağışlamağa qarar berdi. Olar ketirilip, Bağçasarayda qoyuldı ve ale daa anda turalar.
Umerov, o adiselerni hatırlap, Litvanıñ şimdi de «Ukraina ve qırımtatarlarğa sert şekilde qol tutqan büyük bir dost olğanını» qayd etti.
Qırım.Aqiqat muhbiriniñ bildirgenine köre, Litvada Litva tatarları ve Meclisniñ temsilcisi olğan professor Adas Yakubauskas Qırım ile Litvanıñ eski bağlarını hatırlattı – Qırım Hanlığınıñ qurucısı olğan Hacı Geray Vilnüsniñ civarındaki Trakay şeerinde doğdı ve balalığını keçirdi.
Ukrainanıñ Litvadaki elçisi Vladimir Yatsenkovskiy, bu mükâfatnıñ ğayet simvolik olğanını qayd etti, çünki «Ukrainanıñ azatlığı ve menligi oğrunda küreşken bir küreşçi mükâfatnı diger bir küreşçi ve halqara arenada Ukrainanıñ baş ortaqlarından biriniñ qolundan aldı».
Mükâfatlav merasimi Litvanıñ büyük bir bayramı – Litvanıñ birleşmesinde ve, ondan ğayrı, ğarp dünyasına integratsiyasında büyük rol oynağan knâz Mindovgnıñ 1252 senesinde keçken tac kiyüv merasiminiñ kününe doğru ketirilgen Devletçilik künü çerçivesinde olıp keçti.
Mükâfatlavdan soñ Litvanıñ milliy bayrağı ve gerbi köterildi, tarihiy toptan atış yapıldı. Atqan beş askerden ekisi, rekonstruktsiya etilgen Yuzaf Belâk adına Qırımtatar ulan polkunı (18-nci asır) temsil ete ediler.
