İyül 6-da Rostov-na-Donuda bulunğan Rusiyedeki Şimaliy Kavkaz okrugınıñ arbiy mahkemesi, Bağçasaraydaki «Hizb ut-Tahrir» gruppasınıñ davası boyunca muhakeme etilgenlerniñ apaylarından iç birine aqayınen körüşmege izin bermedi. Aynı zamanda malümatta bunıñ sebebi bildirilmey.
Cuma künü mahkeme Bağçasaraydaki «Hizb ut-Taharir» gruppasınıñ işlerini baqmağa devam etti. Oturışuvda qabaatlav tarafınıñ şaatı Ebazer Abibullayev diñlenıldi. Ondan soñ mahkeme, qabaatlanğanlarnıñ biri, Rustem Abiltarovnıñ ömür arqadaşı Elzara Abiltarovanı şaat sıfatında çağırdı. O, Rusiye Anayasasınıñ 51-nci maddesine atıfta bulunıp, şaatlıq ifadeleriniñ berilmesinden vazgeçti.
«Qırım birdemligi»nde, mahkemeniñ bundan soñki oturışuvı iyül 16-da saat 14:00-te olacaq, onda foto ve video qayd etüv aqqında resmiy müracaat baqılacaq, dep qayd ettiler.
2016 senesi mayıs 12-de Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede dört Bağçasaray sakini: Zevri Abseitov, Remzi Memetov, Rustem Abiltarov ve Enver Mamutov yaqalanıp, terrorizmde qabaatlandılar. Olarnı, Rusiyede terroristik tanılğan «Hizb ut-Tahrir» teşkilâtında iştirak etkenlerinden şübheli sayalar.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni yasaq etip, «terroristik» olaraq tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi din alâmetine köre yapıla, dep sayalar. Advokatlar, bu iş boyunca Rusiye uquqqoruyıcı organları tarafından taqip etilgenlerniñ esas olaraq qırımtatarlar olğanını ve olardan ğayrı İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleriniñ taqip etilgenini qayd eteler. Halqara uquq işğal etilgen territoriyada işğalci devletniñ qanunlarını tatbiq etmekni yasaq ete.
